Way namakwit sa Talisay

Taliwala sa grabeng baha ug lunop niadtong Huwebes sa gabii, Agusto 4, 2022, sa Metro Cebu, ang pangulo sa Talisay City Disaster Risk Reduction and Management Office (TCDRRMO) nga si Alvin Santillan nibutyag nga walay nihiklin nga mga molupyo sa Talisay.

Matod ni Santillan, ang tubig sa kasapaan sa nahisgutang siyudad mingsaka apan wala kini naka-over flow.

“Wala mi evacuation. Dunay portion sa lungsod sa Minglanilla gipa-evacuate (ang mga molupyo,” sigon ni Santillan.

“Sa residential area, ang sapa nisaka ang tubig pero wala kaawas,” dugang niini.

Gipasabot ni Santillan nga kon ang uwan nga kusog kaayo molungtad og duha ka oras, ang suba sa Mananga dili pa kini moawas gawas kon moabot na sa sobra sa duha ka oras nga dunay posibilidad nga moawas ang tubig.

Ang personnel sa TCDRRMO niining nagsige og ulan, kanunay nag-monitor sa nagunang mga lugar labi na kadtong bahaunon.

“Sa DRRMO sa Talisay, proactive mi, kon ingon ani gani mag-andam nami pirme. Kon ang ubang mga lugar nagsaka na sa ilang alert level status, ang kami sa Talisay nangandam nami,” dason niya.