Ex-NBA gikuha nga import sa Meralco
Gikuha sa Meralco Bolts ang kanhi magduduwa sa National Basketball Association (NBA) nga si Johnny O’Bryant isip import alang sa ilang kampanya sa 2022 Philippine Basketball Association (PBA) Commissioner’s Cup nga sugdan karong Oktubre 2, 2022.
Si O’Bryant, 29, gipili sa Milwaukee Bucks isip 36th overall pick niadtong 2014 NBA Draft ug nagduwa siya sa team hangtod niadtong 2016.
Ang 6’9” nga magduduwa nabalhin sa Denver Nuggets niadtong 2017 dayon sa Charlotte Hornets niadtong 2018.
Nakaduwa sab si O’Bryant sa Euroleague ubos sa kampo sa Maccabi Tel Aviv.
Sa labing ulahi niyang kampanya, si O’Bryant nagduwa isip import sa Wonju DB Promy sa Korean Basketball League (KBL).
Nanghinaot ang Bolts nga sa pagpangulo ni O’Bryant, hayan makatilaw na sila kampyunato sa Commissioner’s Cup nga wala pa nila sukad masinati.