Canyoneering sa Badian temporaryo nga gipahunong

Temporaryong gipahunong sa Municipal Disaster Risk and Reduction Management Office (MDRRMO) ang canyoneering activity sa lungsod sa Badian tungod sa pagsaka sa lebel sa tubig nga risgo sa mga mobisita sa dapit.

Kini maoy gipahibalo sa Cebu Provincial Tourism Office (CPTO) aron magiyahan ang mga gusto nga mobisita sa maanindot nga lugar sa Agusto 8, 2022.

“Badian Canyoneering is temporarily closed today due to (sic) rising water level declared by the Municipal Disaster Risk and Reduction Management Office (MDRRMO),” subay sa Badian Municipal Tourism page.

Gipasabot sa MDRRMO sa lungsod nga wala pa’y petsa kon kanus-a libkason ang maong mando sanglit nagpadayon ang nasinati nga paguwan sa lalawigan sa Sugbo.

Ang gipasabot sa buhatan nga agianan sa tubig mao ang Matutinao River.

“Indefinite ang suspension tungod kay obserbahun namo ang dagan sa tubig. Most likely ayha ra makabalik (ug canyoneering) kon ang level sa tubig mubalik sa normal,” saysay niini.

“Bisag way uwan sa downstream pero ang kuyaw ang tubig gikan sa upstream, basin mokalit ra og bul-og,” dugang niini.

Gipadala ang disaster ug rescue unit sa lungsod aron maoy regular nga mo-monitor sa kahimtang sa sapa nga dunay koneksyon sa nabantog nga Kawasan Falls.

Sama sa ubang bahin sa Sugbo, ang pipila ka lugar sa Badian nakasinati sa sunodsunod nga bunok sa uwan.

Padayong nipahimangno ang kagamhanan sa mga residente ug turista nga gawas sa pag-enjoy, mas maayo nga magmabinantayon.