SuperBalita Cebu

Balay sa bise mayor sa Bantayan naigo sa kilat, hingpit nasunog

-

Taliwala sa pagbunok sa uwan, ang balay sa bise mayor sa lungsod sa Bantayan sa Sitio Tangkong, Brgy. Kangkaibi, isla sa Bantayan nasunog niadtong Sabado, Agusto 6, 2022, human naigo sa kilat.

Ang Bantayan Bureau of Fire Protection (BFP) nibutyag nga ang sunog nagsugod dihang naigo sa kilat ang atop sa balay ni Bise Mayor Antonio Y. Montemar.

Ang pamilya nibakasyon sa dakbayan sa Sugbo atol sa hitabo.

Si Fire Inspector Noel Cabrera, imbestigad­or, nagkanayon nga ang kusog nga uwan giubanan og panugdog ug kilat apan ang uwan wa nakatabang sa pagpalong sa sunog sa balay sa bise mayor nga mugna sa kilat. “Mahulog nga totally

burned gyud ni kay ang balay made in light materials ang sa sulod kay karaan na ni nga balay pati ang roofing kay made in plastic, dali ni kaon ang kayo,” matod ni Cabrera.

Ang sunog nagsugod sa alas 7:45 sa gabii ug niabot sa ikaupat nga alarma samtang gideklarar nga fire out sa alas 9:30 sa gabii.

Ang danyos gibana-bana nga moabot og P1 milyun.

Unom ka fire trucks, lakip ang gikan sa silingang lungsod sa Madridejos ug Santa Fe ang nitubag aron pagtabang sa pagpakigbu­gno sa kayo.

Hinuon, walay gikataho nga namatay o samdan sa insidente.

Newspapers in Cebuano

Newspapers from Philippines