Bag-ong hepe sa MCPO mopalig-on sa police visibility sa dakbayan
Bag-ong natudlo nga hepe sa Mandaue City Police Office (MCPO) Police Colonel Jeffrey T. Caballes moprayoridad sa pagpalig-on sa police visibility sa dakbayan sa Mandaue ubos sa iyang liderato.
Si Caballes nipahayag ngadto sa mga tigbalita kagahapon, Agusto 8, nga kini nga lakang maoy pagseguro sa seguridad sa publiko.
Nagkanayon siya nga lakip sa mga pamaagi mao ang paghimo og mobile patrol, foot patrol, ug kanunay nga pagpahigayon og kinalit nga checkpoints.
Matod ni Caballes, tan-awon usab niya ang kasamtangang programa sa MCPO ug ipadayon niya kini.
Si Caballes pormal nga nanumpa isip bag-ong MCPO officer-in-charge human sa direktiba gikan sa Police Regional Office (PRO) 7 sa usa ka seremonyas niadtong Agusto 3, 2022.
Si Caballes gikatakda nga mohimo og courtesy call sa buhatan ni Mandaue City Mayor Jonas Cortes sulod ning semanaha.
Gipulihan si Police Colonel Roland Bulalacao, kinsa nibalik sa iyang kanhi posisyon isip pangulo sa Regional Operations Division sa PRO 7.
Samtang, si Mandaue City Councilor ug chairman sa committee on police, fire, and penology Oscar Del Castillo Jr. nagkanayon nga mohatag siya og full support sa liderato ni Caballes sa kalampusan sa MCPO.
Si Del Castillo Jr. nisaysay sa mga tigbalita kagahapon, Agusto 8, nga makigtabo siya kang Caballes bahin sa pagpatunhay sa peace and order sa Mandaue.
Sa sayo pa, si Mandaue City Mayor Jonas Cortes nagkanayon nga mohimo og kolaborasyon ug hiniusang lakang uban sa MCPO ubos sa liderato ni Caballes.