Klarong paghawan sa informal settlers
Daghan ang nakugang sa grabeng baha sa Huwebes sa gabii, Agusto 4, kay bisan kadtong mga dapit nga di bahaanan, gilunopan man. Nagkapuliki ang disaster teams sa pagresponde sa mga emerhensiya niadtong gabhiona.
Sud sa tulo ka mga adlaw, grabe ang baha nga nasinati sa Sugbo.
Pipila ka mga tuig nang nagpahimangno ang mga scientist sa epekto sa global warming sa mga nasod nga humok kaayong maigo niini, nga naglakip na sa Pilipinas.
Karon, nagkapuliki na ang Cebu City sa pagpabalhin ning mga lumolupyo nga giila nga informal settlers tungod sa nagkagrabeng mga baha.
Pipila ka mga tuig na ang nakalabay, si Mayor Michael Rama nimando na sa paghawan sa informal settlers, apan naputol kini human siya naparot sa eleksyon niadtong 2016.
Apan sukad pa kaniadto, way kongkretong plano ang mga administrasyon sa Siyudad kalabot sa informal settlers sa daplin sa kasapaan. Bisan gani sa mga estruktura nga matawag nga ilegal nga gipangtukod sulod sa 3-meter easement.
Di pa tingali ingon ani kadako ang trabahuon kon kaniadto pa gihimoan na kini og plano sa Siyudad sa Sugbo. Apan napasagdan kini sa daghang katuigan hangtod nga nanaghan ug nahimo nang dakong suliran.
Pila man ka buok pamilya o mga tawo ang giilang informal settlers dinhi sa dakbayan? Silang tanan naa na ba nagbotaran sa siyudad o naa bay manguli gihapon sa mga dapit nga ilang gigikanan?
Aron di na magbalikbalik ang problema, maayo gyud nga dunay konkretong plano ang Siyudad nga di lang karon, kon di sa mosunod pa nga katuigan, alang sa pagpahimutang og tarong kanilang naghimo na sa Cebu City nga permanenteng puy-anan.
Kanang duna silay maayong kapuy-an, layo sa kakuyaw sa mga baha.
Seguraduhon usab sa mga barangay nga wa nay mamuyo pagbalik sa mga dapit nga gipabiyaan na.