PSAC mikuha og mga bag-ong miyembro alang sa sectoral groups
Nagsugod na sa iyang tahas ang Private Sector Advisory Council (PSAC) ubos sa pagpangulo ni Aboitiz Group President and CEO Sabin Aboitiz, kinsa gitudlo ni Presidente Feerdinand ‘Bongbong’ Marcos Jr. nga mangulo sa maong konseho sa miaging buwan, aron pagtabang sa pagpalig-on sa kolaborasyon tali sa publiko ug pribadong sektor.
Gihimo na ang regular meetings tali sa PSAC ug Presidente nga nagsugod sa Agriculture and Digital Infrastructure sector groups diin gituki ang mga pasiunang rekomendasyon alang sa unang 100 ka adlaw sa bag-ong administrasyon.
Ang Agriculture group gipangulohan ni Aileen Uygongco-Ongkauko sa La Filipina Uy Gongco ug gilangkoban sa industry leaders nga sila si Chris Po sa Century Group, Francisco Tiu Laurel, Jr. sa Frabelle, Irwin Lee sa Universal Robina, ug Ramon T. Lim sa RNCL Prime Holdings Corporation.
Ang grupo motutok sa short term o mga dinalian nga lakang sa pagtabang sa pagtubag sa food security issues pinaagi sa pagpataas sa produksiyon sa mga mag-uuma ug pagsira sa supply chain gaps.
Ang Digital Infrastructure group gipangulohan ni Union Bank of the Philippines Chief Transformation Officer Henry Aguda ug gilangkoban nila ni Dennis Uy sa Converge, Al Panlilio sa PLDT, Ernest Cu sa Globe Telecom, ug Ramon Jocson sa Bank of the Philippine Islands.
Ang grupo mohimo og pasiunang lakang sa pagpalapad sa access sa internet connectivity ug digitalization initiatives.
Ang konseho gipaabot nga mobutyag sa dugang mga miyembro sa mosunod nga semana alang sa sectoral groups sa Health, Jobs, ug Infrastructure/Tourism aron makigtagbo sa Presidente bahin sa ilang rekomendasyon.