Nagpailang kontraktor nangilad og pulis

Usa ka 38 anyos nga lalaki nga nagpaila nga housing contractor gidakop pinasikad sa warrant of arrest sa kasong esatafa sa Lunes, Agusto 8, human nangilad og pulis.

Giila ni Staff Sgt. Raymond Villafranca, imbestigador sa Argao Police Station ang suspek nga si Roel Pancho, taga Brgy. Lahug, Cebu City.

Samtang ang iyang gibiktima mao si Corporal Euwen Pitogo, nadestino sa Argao Police, usa sa mga arresting officer.

Nasayran nga ang suspek nadakpan niadtong Lunes, Agusto 8 sa gabii sa iyang gipuy-an nga boarding house sa Brgy. Lahug.

“Nagtago tago ni siya unya confidential asset ang nag lead namo sa area para maaresto ni ang suspek,” saysay ni Villafranca sa SunStar.

Sigun pa sa biktima nga si Pitogo nga iyang naila-ila si Pancho niadtong Disyembre 20, 2021 human sa pag-igo sa bagyong Odette. Ang nipaila-ila kanila ang iyang silingan diin nagkaabot sila sa BJMP Argao. Nipaila kini nga usa ka housing contractor.

Matod pa nga nitanyag si Pancho ngadto kaniya nga iyang trabahuon ang balay sa pulis nga naguba sa bagyo. Bisan nga nibalibad si Pitogo sa maong offer tungod kay wa siyay igong budget, apan namugos ang suspek ug nagkanayon nga bayran lang siya sa higayon nga matapos ang construction.

“Miingon man gud siya nga naluoy siya nako ako unya i-clearing sa daw niya kay na stop pa man ang iyang project sa BJMP, agi nalang daw og tabang,” matod pa ni Pitogo.

Naikog ang biktima nga dili makabayad ngadto ni Pancho, kinsa nagsugod na og trabaho sa iyang balay. Napugos siya sa pag-loan. Nasabutan sa duha nga P155,000 ang project, apan human nakahatag og P110,000 isip downpayment, wa na mopakita si Pancho.