Kapin sa 200 ka estruktura ang idemolis

Aduna pay gibana-banang 250 ka illegal structures nga nasulod sa three-meter easement ang gub-on sa Cebu City Government nga nahimutang sa Kinalumsan River sa Barangay Mambaling ug Duljo Fatima.

Kini ang gipahibawo ni Raquel Bohol-Arce, pangulo sa Cebu City Disaster Risk Reduction and Management Office (CCDRRMO), kinsa maoy nagpahigayon sa clearing operations sugod niadtong Agusto 8.

Ang City Government temporaryong nipahiluna sa 29 ka mga pamilya kun 126 ka mga individual nga apektado sa clearing operations sa Kinalumsan River ngadto sa San Nicolas Elementary School.

Si Konsehal Jerry Guardo nagkanayon nga giatiman sa City Hall ang mga pamilya pinaagi sa paghatag og pagkaon ug tubig gikan sa DSWS samtang wa pa silay kapaulian nga pinuy-anan.

Ang chairman sa committee on infrastructure and urban planning and development sa Konseho nga si Guardo niingon nga adunay kapin 2,000 ka mga illegal structure nga nasulod sa three-meter easement sa upat ka flood control projects sa Cebu City nga gidumala sa DPWH-7, 600 kanila nahatagan na og financial assistance.

Ang nahisgutang illegal structures nahimutang sa Lahug river nga maoy boundary sa Barangay Tinago-Tejero ug

Zapatera-Lorega San Miguel, Kinalumsan River habig sa Mambaling ug Duljo Fatima ug Tagunol Creek nga nahimutang sa Cogon Pardo ug Basak Pardo.

Si Mayor Michael Rama nimando sa pagpaguba sa mga illegal structure sa Kinalumsan river habig sa Barangay Mambaling niadtong Agusto 8.

Si Arce, sa iyang bahin, nagkanayon nga iyang girekomendar ngadto kang Rama nga tabangan sa Cebu City Government ug idestino ngadto sa lainlaing departamento ang pagpatuman sa clearing operation sa pito ka mga sapa sa dakbayan alang sa paspas nga implementasyon.