PDRRMO: Tuman sa advisory; 400 ka pamilya apektado

Padayon nga nanawagan ang Provincial Disaster Risk Reduction and Management Office (PDRRMO) sa mga residente sa lalawigan sa Sugbo nga dili magmagahi kon dunay mga advisory ang buhatan ug lokal nga kagamhanan aron maluwas sa disgrasya ning panahon sa ting-uwan.

Ang mga baha nakaapekto sa 400 kapin ka pamilya.

Si Wilson Ramos, interim officer sa PDRRMO, nagkanayon nga sukad sa miaging semana sunodsunod nga pagbunok sa uwan ang nasinati sa Sugbo ilabi na sa kalungsoran hinungdan sa natala nga mga guba ug kadaot nga dala sa pagsaka sa tubig baha.

“Gihangyo nana nato through sa coordination sa PNP nga i-evacuate inkaso kon may hitabo,”matod ni Ramos sa Agusto 9, 202.

“Hangyo nako sa mga local communities nga maminaw ta sa atong mga LDRRMMOs ug barangay...expect lang ta nga we will keep on monitoring sa mga LGUs kon kusog gyud ang uwan, mobuhat og preemptive evacuation labi na kadtong affected sa pagbaha,” dugang niya.

Sa Agusto 9, nasigpatan ang pagkahugmak sa bahin sa national highway sa Barangay Malolos sa naasoyng lungsod. Duna kini mga buak nga gisusi sa mga awtoridad.

Labing uwahing natala sa buhatan ang landslide sa lungsod sa Alegria sa barangay Lower Kawasan sa alas 10:05 sa buntag sa Martes.

Nasinati usab ang samang hitabo sa dakbayan sa Talisay sa Camp 4, Lower Becerril sa lungsod sa Boljoon ug bahin sa lungsod sa San Fernando.

Nalakip sa natala sa buhatan ang apektadong hanging bridge sa lungsod sa Barili nga mobalor og P1 milyon.

Lakip usab sa gilunopan ang kadalanan sa Barangay Guadalupe ug Barangay Valencia sa dakbayan sa Carcar.

Ang sunodsunod nga paguwan nakaapekto sa 137 ka mga pamilya sa Barili, 129 sa dakbayan sa Mandaue, 80 sa dakbayan sa Toledo, 22 sa lungsod sa Minglanilla, 10 sa lungsod sa Compostela, 11 ka mga pamilya sa lungsod sa Carmen ug tulo sa lungsod sa

Dumanjug kun 414 ang tanan.

Wala pa’y datos ang buhatan sa kadaot nga dala sa baha sa mga lagutmon ug kabalayan.

Subay sa weather advisory no. 10 sa Philippine Atmospheric Geophysical and Astronomical Services Administration (PAGASA) Mactan, nasigpatan ang laing low pressure area (LPA) sa silangang Hinatuan, Surigao Del Sur ug padayong nasinati nga habagat.

Subay niini, gimando sa PDRRMO sa tanang mga disaster ug rescue offices sa pag standby ug mag-monitor.