Suholan sa JO sa Naga, umentohan

Dugang P82 ang ihatag sa local government unit sa dakbayan sa Naga ngadto sa mga job order nga kawani nga nagsuweldo og ubos sa P400 matag adlaw.

Mao kini ang pahibawo ni City of Naga Mayor Valdemar “Val” Chiong atubangan sa mga kawani atol sa Lunes nga flag raising ceremony.

Matod pa ni Chiong nga isip halad ngadto sa mga JO sa Siyudad, iya kining gipangitaan og budget aron makadawat na og inadlaw nga P400 nga suholan ang mga JO nga nagsweldo pa lang og P318.

“I think they are very happy about that. Mao nay mahitabo starting sa month of September,”matod ni Chiong.

Ang Siyudad dunay 400-500 nga mga JO. Hinuon gipasabot sa mayor nga duna nay pipila ka mga JO nga nagdawatan na og P500 nga suhulan.

“Pero naa baya sad nay nakadawat og P500. Naay mga midwife, naay nurses, mga drivers sa heavy equipment operator,”dugang sa mayor

Dugang ni Chiong nga ang makadawat og P82 nga dugang suholan kadtong naa sa mga field work sama sa mga manilhigay, ingon man sa kadtong tigbantay sa kasilyas.

Naglaum ang mayor nga dako kini nga ikatabang sa mga makabanepisyo kay madugangan ang kita nga ikatabang na sa ilang mga pamilya.

“Siguro makatabang gyud kay nisustiner man gani na sila sa gamay unya karon dunay umento gamay. Mao ra man nay advantage sad. Ako na silang giingnan nga bintaha nato kay naa raman ta sa atoa,” dugang sa mayor.

Samtang si Chiong nagpahimangno kanunay ngadto sa tanang mga trabahante nga seryusohon ang ilang trabaho lakip na ang paghatag og tarong nga serbisyo sa tanan nga dunay transaksiyon sa balay lungsod.

“Ako nag problema pa ko karon kay daghang gusto mang-apply. Mao na kon dili na mo gusto manrabaho, sulti lang mo kay undang kay lisod man nga nagtuo mo, ah ingon ani akong trabaho unya dili na lang ko,” dugang ni Chiong.

BENJIE B. TALISIC / MISTING:Ang lokal nga kagamhanan sa Dakbayan sa Talisay mopahigayon og misting sa tanang mga tunghaan sa dakbayan, pribado o publiko, aron masumpo ang dengue fever nga dala sa mga lamok.