BPAT sa Cebu City

Makaluluoy ang kahimtang sa Barangay Peacekeeping Action Team (BPAT) sa dakbayan sa Sugbo. Kanunay nga malangay og pipila ka buwan ang ilang suweldo. Samtang, dunay hugonhugon nga kunhoran ang ilang gidaghanon subay sa paghashas sa job order ( JO) employees sa dakbayan.

Ang BPAT napamatud-an nga gamit kaayo isip usa sa mga force multiplier sa kapulisan sa dakong kalihokan nga nagkinahanglan og hugot nga seguridad. Dunay mga higayon nga mas gamit ug daling masangpit ang mga sakop sa BPAT labi na sa bug-at nga trabaho sa barangay.

Pipila sa nahinabi nga BPAT ning tagsuwat dunay pangutana, gawas sa kanunay pagkadelatar sa ilang suweldo, wagtangon o kuhaan kaha ang ilang grupo? Ang ubang sakop sa BPAT naglaum nga ang bag-ong nagdumala sa Dakbayan motan-aw usab sa ilang kaayohan.

Matod pa, ang ilang suweldo gamay lang apan dako na kaayo kini og matabang sa ilang kakabus apan gilangaylangay pa sa paghatag ang ilang hinagoan. Dili ba nakagahin na kini sa budget sa City Hall?

Sa pikas bahin, ang lakang sa lokal nga kagamhanan nga mohashas sa mga JO, lakip sa BPAT, insakto usab aron matangtang ang mga walay gamit o kadtong igo lang moaktibo kon tingdawat na sa suweldo. Nag-usik sa kuwarta sa gobiyerno.

Apan ang BPAT usa sa mga grupo sa JO sa dakbayan nga importanteng kaabag sa kapulisan sa pagmintinar sa kahusay ug kalinaw, labina karon nga namatikdan nga mibalik ang krimen nunot sa pagluag sa restrictions sa pandemiya sa Covid-19 ubos sa Alert Level 1.

Ang pwersa sa kapulisan kuwang sa kadako sa dakbayan busa, ang BPAT uban sa mga tanod dako og tabang isip frontliners sa seguridad ug ubang kalihokan sa matag barangay.

Ang pangindahay sa kabus nga BPAT nga malili ni Mayor Michael Rama ang ilang kahimtang.