Rogado mipaulbo og 33 sa Shaabaa

Kanhi kauban ni June Mar Fajardo nga si Moncrief Rogado mipaulbo og 33 puntos, aron pangulohan ang Batch 2003 ngadto sa 80-65 nga kadaugan batok sa Batch 2004 sa nagpadayon nga Sacred Heart Ateneo Alumni Basketball Athletic Association (SHAABAA) sa SHSAteneo de Cebu campus sa Canduman, Mandaue City.

Gawas sa iyang puntos, si Rogado kinsa dungan nga nakaduwa ni Fajardo sa University of Cebu niadtong tuig 2010 sa dihang ilang gilangkat ang kampiyonato sa Cesafi, nilangkat usab og 17 ka rebounds ug duna pay upat ka assists alang sa ilang ikatulong sunodsunod nga daog, 3-0, aron temporaryong angkunon ang liderato sa Division B.

Niabag kang Rogado sa opensa si Justin Huang kinsa mangtas usab nga nipakatap og 28 puntos ug 10 ka rebounds nga may lima ka assists.

Gikan sa pagsugod sa panag-engkuwentro, way kutas nga miarangkada gilayon ang Batch 2003.

Ug ang hugot nga depensa niini maoy nakaparalisa sa opensa sa Batch 2004, kinsa sa kinatibuk-ang third quarter igo lang nakapugnit og sais puntos samtang gipaarakan kini og 20 puntos sa ilang kaatbang.

Sa kapildihan, ang Batch 2004 nga nahagsa sa 1-2 nga baraha, gipangulohan ni Franco Te nga may 29 puntos ug John Consunji nga mitali og 15 puntos.

Sa laing duwa, nagkumboya sila si Mark Jeffrey Ting, Erwin Ngo, Jason Arquizola ug John Paul Cabrera og 54 puntos, sa dihang gilubong sa Batch 2001 ang Batch 1994, 83-57.

Si Mark Jeffrey Ting ug Erwin Ngo mipaklig 15 ug 14 puntos samtang kuyaw usab nga nakaduwa si Jason Arquisola kinsa milanit og 13 puntos nga gibuwakbuwakan og walo ka rebounds.

Nakatampo usab og 12 puntos si John Paul Cabrera alang sa ikaduhang daog sa Batch 2001.

Gikan sa 21-11 nga labaw sa first half, ang Batch 2001 padayong niarangkada ug niposte kini sa ilang pinakadako nga labaw, 60-30, sa third quarter paingon ngadto sa yanong kadaugan.

Ang ex-pro nga si Joel Co nikutlo og 17 puntos ug walo ka rebounds alang sa napilding Batch 1994 ug 10 puntos usab ang natampo ni Jacques Ian Lee.

Samtang gipatapsingan usab sa Batch 1999 ang Batch 1998, 62-58; ug yano ra usab nga gipukan sa Batch 2000 ang Batch 1992, 71-58.