Gilas naghuwat kang Sotto
Ang Samahang Basketbol ng Pilipinas (SBP) nakigsabot pa kang Kai Sotto kalabot sa iyang pagduwa isip sentro sa Gilas Pilipinas sa FIBA Basketball World Cup 2023.
Mao kini ang gibutyag ni SBP executive director ug spokesperson Sonny Barrios kinsa nipadayag sa iyang paglaum nga motangdo ang kampo sa batan-ong player.
“Ang pagkakaintindi ko, si Kai, gusto niyang lumaro for
Gilas,” matod ni Barrios atol Philippine Sportswriters Association (PSA) Forum sa Martes, Agusto 9, taho sa ABS-CBN.
“We are still talking to him,” dugang niya. “Harinawa eh, maging positive ang sagot ng kampo ni Kai Sotto sa ating panawagan.”
Si Sotto gitakdang mobalik sa Adelaide 36ers sa National Basketball League sa Australia human siya wa napili sa NBA Rookie Draft karong tuiga.
Ang 20-anyos nga sentro niduwa kanhi alang sa senior Philippine team sa FIBA Asia Cup qualifiers ug FIBA Olympic Qualifying Tournament sa miaging tuig.
Si Barrios niangkon nga ang Gilas Pilipinas nagkinahanglan sa serbisyo ni Sotto alang sa sunod tuig nga World Cup, kana kon ang naturalized player slot mahiadto kang Filipino-American guard Jordan Clarkson.
Si Ateneo de Manila University center Ange Kouame, kinsa na-naturalized sa miaging tuig, kuli nga makaapil sa World Cup roster.
Duna hinuoy laing mapilian ang Pilipinas kon mga dagkong player ang hisgutan, sama kang six-time PBA Most Valuable Player June Mar Fajardo ug Fil-Nigerian standout AJ Edu. Apan ang pag-apil ni Sotto mahinungdanon.
“Napakagaling po noong AJ Edu. Ang problema po doon, nagre-recur ang kanyang injury. Siguradong makakatulong ang dasal, gumaling na ng magaling na magaling,” pagpasabot ni Barrios.