Pirma na lang ni Rama kuwang aron CCMC contract ma-terminate
Pirma na lang ni Mayor Michael Rama ug pormal nang ma-terminate ang P907 milyunes nga phase 4 sa Cebu City Medical Center (CCMC) nga maoy magtiwas unta sa ikawalo hangtod sa ika-10 nga shell sa tambalanan.
Kini ang gipadayag ni Atty. Collin Rosell, Secretary to the Mayor sa Biyernes, Pebrero 3, human ang Contract Termination Review Committee (CTRC) nga gipangulohan ni Atty. Carl Vincent Gimena nga maoy gitahasan ni Rama aron sa paghatag og “due process” sa M.E. Sicat Constructions Inc.
Una niini, ang CTRC nangayo og “verified report” gikan sa Department of Engineering and Public Works (DEPW) sa CCMC nga gitrabaho sa M.E. Sicat Construction.
Ikaduha, gipadad-an sa CTRC og show cause ang contractor ug nipadayag nga wala silay pagsupak sa pormal nga pagputol sa kontrata.
Ang City Government, ubos sa direktiba ni Rama, nipahunong sa civil works sa CCMC sa Nobiyembre 9 ug magtulo na ka buwan karong Pebrero 9 nga walay nagtrabaho sa ospital.
Gipadayag ni Rosell nga sa ika-86th Charter Day celebration sa Cebu City karong Pebrero 24, ipahibawo ni Rama ang kongkreto nga direksyon sa CCMC aron pagtiwas sa modernong pampublikong tambalanan sa Siyudad.
Ang mayor unang nipadayag nga dili na siya sa paagi sa procurement law nga kinahanglan pang ipaubos sa
public bidding ang pagtiwas sa
CCMC.
Iyang gianunsyo nga adunay tycoon dinhi sa Cebu nga nipadayag sa iyang kaandam pagtiwas sa maong tambalanan apan hangtod niining pagsuwat, si Rama o Collin wala pa nibutyag sa ngalan.
Ang mayor nagkanayon nga pabor siyang sundon ang public-private partnership (PPP) aron dili na mogasto og kwarta ang City Government ug magamit sa laing programa o proyekto ang pundo.