Rommel Tuico, JayR Siaboc guest sa launching sa 88.3 XFM Cebu
Karong adlawa, Marso 20, maoy grand launching sa labing bagong FM radio station sa dakbayan sa Sugbo, ang 88.3 XFM.
Ang hitmakers nga sila si Jay-R Siaboc ug Rommel Tuico magsilbing special guest sa maong kalihokan nga moharana karong 3:00 sa hapon sa Cogon Ramos Gym. Gihulagway sa station manager nga si Johnley Bayking nga ‘all in one’ ang programa sa XFM. “Lahi sa tradisyonal nga FM station nga pure music pero dinhi naay news oriented. We are bringing the AM format to FM frequency… but still we have entertainment naa pud mi live drama,” matod pa ni Bayking. Kompleto sa rekados ang XFM tungod kay ang program format sa usa ka news and public affairs nga sagad mapaminaw sa mga AM band, ang ila sab nga ihatod diha sa FM band.
Aduna sab silay kalingawan sama sa ‘live radio drama’ ug music.
Ang XFM sa Cebu magsilbi nga ika-17 nga radio station ubos sa pagdumala sa Yes To Health Broadcasting Network Inc. nga gipanag-iya ni Dr. Remelito Uy. Moabot ang sibya sa maong radio station sa tibuok probinsiya sa Sugbo, lalawigan sa Bohol, Leyte ug ubang bahin sa Negros Island. Gitinguha sa maong broadcasting company nga mas mapalapdan pa nila ang ilang sibya lukop nasod nga maghatod sa mga lab-as nga balita ug mga kalingawan.