Transport coop wa kauyon sa consolidation extension
Wa makauyon ang Cebu-based transport cooperative sa laing lugway sa deadline sa pagkonsolida sa public utility vehicles (PUVs) ngadto sa mga kooperatiba o korporasyon nga mamasahero.
Samtang nalipay ang Samahan ng Tsuper at Opereytor Nationwide (Piston)-Cebu sa gipahibalo sa Malacañang nga gi-extend ang deadline hangtod sa Abril 30, 2024.
Giaprubahan ni Presidente Ferdinand Marcos Jr. ang rekomendasyon ni Transportation SecretaryJaime Bautista nga hatagan og dugang tulo ka buwan alang sa consolidation niadtong mga tradisyunal nga PUV operators ug drivers nga nipadayag og intensyon nga magkonsolida apan wala makaabot sa deadline sa Disyembre 31, 2023.
Si Ellen Maghanoy, chairperson sa Federation of Cebu Transport Cooperatives, niingon sa Superbalita Cebu sa Huwebes, Enero 25, 2024, ang mga modernong PUVs nakasinati og kalisod sa pagpakigkompetensya sa TPUJs sa termino sa panginahanglan sa pasahero ug fuel consumption.
Ang dugang paglangay sa Public Utility Vehicle Modernization Program (PUVMP) sama sa extension sa franchise consolidation, matod ni Maghanoy, nakahatag og dili maayo’ng epekto sa transport cooperative nga kugihan nga nituman sa programa.
Matod niya nga ang transport cooperative karon nag-operate nga adunay dako nga binuwan nga amortization sa banko tungod sa outstanding nga utang ug mga pautang aron ipalit sa modernong PUV units.
Kon magpadayon kini, ang kooperatiba mapildi sa mga TPUJ tungod sa gusto sa riding public nga mas ubos nga plitehan. Dugang pa, ang traditional jeepney adunay mas ubos nga konsumo sa gasolina batok sa modernong PUVs, dugang ni Maghanoy.
“It really means wala gyud sila sa mga plano nga gisulti nila, wala gyud silay plano hangtod sa Abril 30 (deadline),” matod ni Maghanoy.
Sa pakighinabi niadtong Huwebes, ang presidente sa Piston-Cebu nga si Greg Perez niingon nga ang mga sakop sa PISTON-Cebu nalipay sa maong kalambuan samtang nagpadayon sila sa ilang pagbubo og mga paningkamot sa pagbasura sa PUVMP.
Matod ni Perez nga kinahanglang ilisan ang PUVMP og Jeepney Modernization program nga mas responsive ug balanse sa panginahanglan sa riding public ug transport sector, lakip na ang mga tradisyunal nga jeepney operators ug drivers. Siya niinsistir nga ang Piston-Cebu dili supak sa modernisasyon sa mass transportation sa nasod, hinunoa kinahanglang balanse ang polisiya sa tanang stakeholders.
Ang tulo ka bulan nga extension resulta sa ilang hiniusang aksyon sa pagpadayag sa ilang kabalaka ug dili pag-uyon sa pagpatuman sa PUVMP program, matod ni Perez.