Rail transit planong ibalik
Nagplano ang Department of Transportation (DOTr) nga ibalik ang rail transit human sa pipila ka mga dekada.
Si Transportation Undersecretary Timothy John Batan nakigtagbo kang Cebu Governor Gwendolyn Garcia niadtong Huwebes, Pebrero 29, 2024, ug gipresentar ngadto sa naulahi ang “Metro Cebu Urban Transport Master Plan.”
Dili na bag-o sa mga Sugbuanon ang sistema sa riles nga paagi sa transportasyon tungod kay usa kini sa mga dagko’ng paagi sa pagbiyahe gikan sa lungsod sa Argao sa habagatan ngadto sa Danao sa amihanan niadtong kolonyal nga mga panahon hangtod sa katapusan sa Ikaduhang Gubat sa Kalibutan.
Human sa tigom ni Garcia, gipasabot ni Batan sa mga tigbalita sa usa ka interbyo nga ang proyekto anaa pa sa pre-planning stages, busa wala pay konkretong timeline, gibana-bana nga gasto, ug tinubdan sa pundo.
PPP
Matod niya nga human makighinabi sa gobernador, nahunahunaan ang ideya sa public-private partnership (PPP) ug sa local government unit (LGU) nga modumala sa proyekto.
Ubos sa Metro Cebu Urban Transport Master Plan sa 2019, si Batan niingon nga ang railway-based transport backbone giila nga usa ka mahinungdanong sistema sa transportasyon aron matubag ang nagkadako nga panginahanglan sa mass transit.
Sa presentasyon sa DOTr atol sa tigom, ang gisugyot nga subway system nagtumong sa pagpakunhod sa kahuot sa trapiko, pagpakunhod sa oras sa pagbiyahe, pagpalambo sa interconnection, pagpalambo sa serbisyo sa pasahero ug commuter, pagpataas sa climate resiliency, ug mas sayon nga transportasyon sa publiko alang sa mga huyang nga grupo ug mga tawo nga limitado ang paglihok.
MASTER PLAN
Ang master plan adunay duha ka hugna: Phase 1 mao ang Urban Mass Rapid Transport (UMRT) Central Line nga motadlas gikan sa Danao City, Compostela, Liloan, Consolacion, Mandaue City, Cebu City, Talisay City, Minglanilla Naga City, San Fernando, ug Carcar City .
Ang Phase 2 mao ang UMRT
Coastal line nga magsugod sa Talisay City, Cebu City, Mandaue City, ug Lapu-Lapu City.
Ang Metro Cebu Urban Transport Master Plan nahuman niadtong 2019 ug giumol sa Japan International Cooperation Agency ( Jica).
Sa report gikan sa Cebu Provincial Government Public Information Office niadtong Huwebes, Pebrero 29, 2024, si Garcia nisugyot sa mga delegado sa DOTr nga tugotan ang mga LGU sa Sugbo sa pagpatuman sa gisugyot nga proyekto, samtang ang DOTr magpadayon sa ilang supervisory control.
Ang taho nidugang nga ang Kagamhanan sa Lalawigan kinahanglan nga mopresentar sa proyekto sa mga pribadong kompaniya pinaagi sa iyang Economic Enterprise Council (EEC) alang sa usa ka posible nga kolaborasyon sa PPP, ubos sa mga lagda ug regulasyon nga gitakda sa balaod.
Sa pag-implementar sa LGU sa proyekto, ang gikinahanglan nga mga permit ug ang kooperasyon sa mga LGU nga nalambigit siguradong makapadali sa pagpatuman ug pagkompleto sa gisugyot nga subway project.