Giyera sa Israel-Gaza lakip sa iampo sa Eid’l Fitr

Liboan ka mga Muslim ang gipaabot nga mosalmot sa Eid’l Fitr prayer celebration, nga nagtimaan sa pagtapos sa Holy Month of Ramadan sa Islam sa dakbayan sa Sugbo.

Apil na niini ang mga lokal ug gikan sa lainlaing dapit sa nasod, ingon man mga langyaw sa Siyudad.

Si Cebu City head of Muslim Affairs Ijodin Saripada Mamacol niingon nga atol sa selebrasyon mag-ampo usab sila alang sa paghunong sa gubat sa Israel-Gaza alang sa kaluwasan sa mga Pilipino, Palestinian, ug mga inosenteng sibilyan nga nagpuyo didto.

Si Mamacol, nitug-an sa SunStar Cebu niadtong Lunes, Abril 8, nga ang petsa sa Eid’l Fitr nagpabiling tentative bisan pa sa proklamasyon sa Malacañan nga naghimo sa Miyerkules, Abril 10, 2024, isip regular holiday sa paghandum sa maong kasaulogan.

Matod niya nga mohimo pa sila og moon sighting activity uban sa ubang mga lider aron pag-obserbar sa dagway sa crescent moon, nga maoy magdeterminar sa pagsugod ug pagtapos sa Ramadan.

Si Mamacol, executive director sa Office of Muslim Affairs and Indigenous Cultural Communities (OMAICC) sa dakbayan sa Sugbo, niingon nga ang pagtan-aw sa crescent moon nagpasabot sa pagsugod sa matag lunar month.

Tungod kay ang mga Muslim naggamit sa lunar nga kalendaryo, nga nagsunod sa mga hugna sa bulan, ang Ramadan magsugod ug matapos sa lainlaing mga panahon matag tuig.

Kon dili makita ang crescent moon, mahimo’g i-postpone ang pagsugod ug pagtapos sa Ramadan.

Bisan pa, gigamit nila ang mga kalkulasyon sa astronomiya o relihiyusong giya aron mahibal-an ang sinugdanan, nga nagresulta sa mga kalainan sa rehiyon sa petsa sa pagsugod.

Ang lider sa Muslim miingon nga kon dili Miyerkules, ilang gitan-aw ang Huwebes, Abril 11, aron saulogon ang katapusan sa Ramadan.

Ang selebrasyon nagsugod niadtong Marso 12.

UNSA ANG RAMADAN?

Panahon sa Ramadan, ang mga Muslim nagpuasa gikan sa kaadlawon hangtod sa pagsalop sa adlaw, nag-ampo, nag-recite sa Quran, ug mga buhat sa gugma nga putli sulod sa 30 ka adlaw.

Ang pagpuasa, usa sa lima ka haligi sa Islam, nagsimbolo sa usa ka espirituhanong pakigbisog batok sa mga tinguha samtang nagpalig-on sa mga bugkos. Ang ubang mga haligi mao ang deklarasyon sa pagtuo, adlaw-adlaw nga pag-ampo, limos, ug panawduaw.

Ang mga Muslim nga nagpuasa sa panahon sa Ramadan kinahanglan nga maglikay sa pagkaon, pag-inom, pagpanigarilyo, ug sekswal nga kalihukan gikan sa pagsubang sa adlaw hangtod sa kilumkilom sulod sa usa ka bulan.

PAGTAPOS SA RAMADAN

Matod ni Mamacol nga alang sa Eid’l Fitr karong tuiga, ilang gipaabot nga dili mominus 2,500 ka mga Muslim sa dakbayan ang mosalmot sa selebrasyon.

Matod niya nga magsugod kini sa alas 6:30 sa buntag, ug adto ipahigayon sa Plaza Independencia sa Barangay San Roque sa dakbayan sa Sugbo.

Ang selebrasyon pangulohan sa ilang bisita nga Imam o religious leader nga si Muhammad T. Khalil, usa ka social media Muslim personality gikan sa Manila.

Si Khalil gilauman nga mohatag og espesyal nga khutbah o sermon alang sa pag-ampo sa Eid. Gawas sa mga lokal nga Muslim, apil na ang mga gikan sa ubang bahin sa nasod, gipaabot nga mosalmot ang mga taga Cebu nga langyaw nga Islam followers.