Siak sa relasyon midako

Mauli kaha ang maayong kabubut-on sa pulitika tali nila ni Cebu Gov. Gwendolyn Garcia ug Cebu City Mayor Michael Rama? Nagkalapad ang pagkasiak sa ilang relasyon tungod sa direktang pagsungag ni Garcia batok kang Rama sa mga isyo sa dakbayan sa Sugbo. Ning ulahi, si Garcia nidapig sa Cebu Port Authority (CPA) bahin sa kontrobersiya tali sa Cebu City Government.

Matod ni Garcia, way huresdiksiyon ang Dakbayan sa CPA sa pagmando kang Rama sa paghunong ug pagkoral sa proyekto nga port extension. Ang CPA ug Cebu City daan nang dunay bangi nga nag-ung-ong sa korte bahin sa panag-ilog sa pagpanag-iya sa Campania Maritima duol sa Cebu City Hall.

Samtang, unang pagkasiak sa relasyon nila ni Rama ug Garcia tungod sa pagluwat og mando sa naulahi sa bus stop sa Bus Rapid Transit (BRT) duol sa Kapitolyo.

Matod ni Garcia, nakababag kini sa view sa Kapitolyo nga usa ka heritage site ug giingong permiso gikan sa komisyon sa kultura nga ‘kalapasan sa balaod.’ Tungod niini, unang higayon nga si Rama niluwat og mahait nga pulong sa gobernador nga ‘dili kini manghilabot sa mga kalihukan sa Dakbayan.’

Sa Lunes, Abril 8, si Garcia niuban kang Francisco Comendador III, chief executive officer and general manager sa CPA, sa usa ka press conference.

Si Comendador nipasidaan nga mokiha sa Dakbayan tungod sa pagsulod og koral sa ilang dapit. Makita na ang pag-abante batok kang Garcia. Samtang, si Rama wa na magyango-yango lang ug nisungag sama sa dunay ‘gisaligan’ sa taas.

Dili ba naobserbahan nga si Rama kaabag ni Garcia sa One Cebu Island nga konsepto? Dili na kini epektibo. Nganong wa una magsabot sa wa pa niluwat og pamahayag? Unsay nagpaluyo ning tanan? Dili kaha ang nagkaduol nga midterm elections sa 2025?

Nagkadaku ang pagkasiak sa relasyon sa duha, sama sa duol sa imposible nga matakdo pa kini og balik.