P20.5M shabu nasakmit sa buy-bust sa Lapu; 2nasikop
Kapin sa P20.6 milyunes nga shabu ang nasakmit sa mga buy-bust sa Metro Cebu sa Miyerkules, Mayo 8, 2024. Nasikop usab ang laing 18 ka mga suspetsadong durugista sa lahi nga mga operasyon sa Central Visayas.
Atol sa buy-bust sa Sitio Kapaping, Barangay Basak, dakbayan sa Lapu-Lapu alas 10:17 sa gabii, di mominos P20.5 milyunes nga balor sa gituohan nga shabu ang nasakmit sa kapulisan sa Lapu-Lapu City Police Office (LCPO) ug duha ka giila nga mga high-value individual (HVI) ang nasikop sa kapulisan.
Ang mga suspek nga pulos mga babaye giila nga mao sila si alyas Gaga, 44, ug alyas EngEng, 26, pulos mga residente sa Basak-Merkado, Barangay Basak, Lapu-Lapu City.
Nasakmit gikan sa duha ka mga suspek mao ang binulto sa gituohang shabu nga motimbang og 3,026.35 gramos nga dunay standard drug price nga P20,579,180.
Ang operasyon sa Police Station 4 sa LCPO gipangulohan ni P/Maj. Judith Besas, station commander, kauban ang City Intelligence Unit (CIU)/City Drug Enforcement Unit (CDEU) sa LCPO ug PNP Drug Enforcement Group 7 ubos sa pagduma ni P/Col. Ali Baron, OIC sa LCPO.
“Kini nagtimaan sa lain na usab nga kadaugan sa atong pakigbatok sa ilegal nga droga tungod sa negatibong epekto niini sa atong mga komunidad. Sa makausa pa, ang pasalig ug kakugi sa atong mga operational units nagbunga, ug gusto nakong pasalamatan sila sa ilang walay paglubad nga paningkamot niini nga gubat,” matod ni Baron sa FB post sa kagamhanan sa Lapu-Lapu City.
Ang mga suspek anaa na karon sa kustodiya sa LCPO.
Sila paskaan og kaso nga kalapasan sa Republic Act 9165 kun Comprehensive Dangerous Drugs Act of 2002.
EX-CON SIKOP
Bag-ong nakagawas gikan sa Cebu City Jail (CCJ) sa kaso sa ilegal nga drugas nadakpan pagbalik sa Labangon Police Station sa pagpangulo ni Police
Major Eraño Regidor atol sa buy-bust sa Sitio Callejon, Brgy. Labangon, Dakbayan sa Sugbo, alas 7:10 sa gabii sa Miyerkules, Mayo 8, 2024.
Ang suspek giila nga si Dexter Remolado Magkilat, alyas Titing, 48, lumad nga taga dakbayan sa Ozamis apan kasamtangang nagpuyo sa Sitio Callejon, Labangon.
Nakuha gikan sa suspek ang mga pinutos sa gituohang shabu nga motimbang og 10 gramos nga dunay standard drug price nga P69,700 nga gidala sa PNP Forensic Unit 7 alang sa chemical analysis.
Matod ni Regidor nga nadakpan na kaniadto sa Labangon Police Station ang suspek sa kaso gihapon sa ilegal nga drugas apan sa iyang paggawas nibalik ni sa pagpamaligya kay giingong gipaningil sa iyang utang sa usa ka drug personality.
Aron makabayad siya, iyang i-roll ang halin apan way swerte kay namonitor siya pagbalik sa Labangon Police Station ug nadakpan sa buybust.
BAHIN SA SUGAL
Samtang, ang Police Regional Office (PRO 7) nakasikop usab og 22 ka mga sugarol atol sa 15 ka operations batok sa ilegal nga sugal sa Central Visayas, pipila niini mga usher sa illegal numbers game sama sa illegal swertres nga gireklamo sa Philippine Charity Sweepstakes Office (PCSO).
Nakasakmit usab sila’g usa ka loose firearm ug usa ang nadakpan.
Samtang sa kampanya batok sa mga wanted person, ang kapulisan nakasikop og 19 ka mga tawo nga dunay mga pending warrant of arrest, diin duha kanila giila nga mga most wanted person.
Sa mga ordinansa sa lainlaing local government units, dunay 1,688 ka mga tawo nga nakakalapas ug nadakpan.
Sa kinatibuk-an, sila nakamulta og P683,420.