Tony Cuenco vs. Margot?

Pastilan, bukal na g’yud og maayo ang kaldero sa politika dinhi sa dakbayan sa Sugbo.

Ang paglansar ni kanhi kongresista Tony Cuenco sa susama nga pwesto sa eleksyon sunod tuig maoy maisip nga barometro kon ang iyang kadaugan sa nangagi nga mga piniliay dili ba kay sakop siya sa Bando Osmeña Pundok-kauswagan.

Namatud-an na man gud nga popular g’yud ang BOPK sa mga botante nga bisan kadtong mga tawo nga daw dili ka makatoo nga makadaug, modaug man sa eleksyon.

Gitan- aw nako nga lig- on g’yud hinoon nga kandidato pagka kongresista si Tony Cuenco apan dili na siya sakop sa BOPK kon molansar niya sa eleksyon karong sunod tuig.

Si Cuenco nakahukom pagdawat sa pagdapit ni Mayor Michael Rama nga maoy himoong kandidato sa pagka kongresista diha sa south district tungod kay dili man modawat ang BOPK kaniya.

Nasabtan nako nga gusto g’yud nga mobalik sa pagka kongresista si Tony. Matud niya kaniadto nga molansar lang siya sa pagka kongresista kon ubos sa BOPK, apan giusab niya ang iyang hunahuna.

Sa among panaghinabi ni Tony iya ko nga gipasabot nga kay wala man g’yud siya kuhaa sa BOPK nga gipangulohan ni Kongresista Tommy Osmeña, napugos siya sa pagdawat sa tanyag ni Rama.

Giangkon ni Tony nga dili g’yud unta siya gusto nga magkasangka sa politika ug ang mga Osmeña, apan wala siya’y mahimo. Sa akong pagsabot, ang usa sa labing lig-on nga kaatbang ni Cuenco, kon madayon, mao ang asawa ni Tommy nga si Konsehal Margot Osmeña.

Girespitohan sa katawhan si Margot kay dili siya sama sa uban nga politiko kaayo og hunahuna. Nakaila ko ni Konsehal Osmeña bisan kaniadto nga dili pa siya konsehal nga serbisyo ra g’yud ang iyang tinguha.

Nakaingon ko nga kon si Margot maoy sabakon sa BOPK nga moatbang ni Cuenco, usa siya sa lig-on nga kandidato.

*** Nahibaw-an na nga si Rama magpapili pag-usab pagka mayor ug si Tommy maoy moatbang kaniya. Sila maoy mga “leading candidates” pagka mayor dinhi sa dakbayan. Pulos lig-on nga kandidato.

Apan pagka bise mayor kinsa man? Sa BOPK nahibaw-an na nga magpapili pag-usab si Vice Mayor Joy Augustus Young isip tandem ni Tommy. Sa kampo ni Rama wala pa mahibaw-i.

Nakadungog ko nga usa sa gipangulitahan nila mao si Konsehal Edgardo Labella. Daghang mga kapitan ug konsehal sa barangay ang mikombinsir na ni Labella nga padaganon sa pagka bise mayor.

Gitug-anan ko ni Labella nga gihinuktokan niya kini pag-ayo. Gusto niya nga konsultahon pa niya ang iyang pamilya ug mga suod nga higala.

Si Labella dili na makalansar pag-usab isip konsehal kay napupos na ang tulo niya ka termino, gawas kon sundon niya si Konsehal Jun Pe nga mobali pagpapili sa south district.

Ang gitimbang-timbang nga si Labella lig-on usab nga moatbang ni Young. Buyno, paabuton nato ang kalamboan sa politika pagka bise mayor.

*** Pagka kongresista, ang kampo sa BOPK maoy wala pa mobutyag sa ilang bareaha didto sa south district, apan sa north district nasayran na nato nga mobalik si kanhi kongresista Raul del Mar.

Wala malilong kanato kon unsa kalig-on si Del Mar sa pagka kongresista diha sa north district nga gigunitan sa ilang pamilya og kapin na sa 20 ka tuig nga walay pilde-pilde.

May mga ngalan nga mitumaw nga mao kuno ang padaganon sa kampo ni Rama aron iatbang ni Del Mar. Apan silang tanan klaro kaayo nga kataw-an ra ni Del Mar.

Giingnan ko ni Cuenco nga basin hangyoon sa kampo ni Rama si kanhi konsehal Hilario Davide Jr. nga maoy moatbang ni Raul. Apan giprangkahan nako si Tony nga dili kini mahitabo.

Mipahibalo na si Davide nga molansar siya pagbalik pagka gobernador sa Sugbo ug gani daw “anay” siya karon nga naglihok sa hilom diha sa kalungsoran.

Pastilan, kaalegre na sa politika sa dakbayan sa Sugbo. Ang eleksyon dinhi sa dakbayan maoy usa sa angay’ng tutokan karong eleksyon sa sunod tuig.