Adik sa wifi
Nagkatawa ko sa akong asawa dihang nangita mi og kapuy- an sa Batanes kay usa sa iyang mga pangutana, gawas sa kon unsa kalimpiyo, kaluwas ug kahamugaway sa kuwarto, mao nga kon duna bay wifi ang resort. Gilabyan namong resorts nga limpiyo, luwas ug hamugaway ang mga kuwarto. Kay wa silay wifi.
Nakaseguro kong di monopoliya sa akong asawa ang paghatag og dakong importansiya sa wifi. Sa bag- ong panahon, bisan asa ta padung, maduol man o malayo, nagusbaw ang atong pagsalig sa internet alang sa komunikasyon, kasayuran ug kalingawan. Maong kon may mga negosyante pang nahibung nganong gilangaw sila, tingali usa sa mga hinungdan mao ang ka wa nilay wifi.
Nga dakong eskandalo. Labi na kon ang imong negosyo kinahanglang modani og daghang kustomer. Kay ang wifi labihang baratoha. Depende sa kompaniya sa telepono nga imong dangpan, ang binuwan nga bayranan sa wifi maggikan sa P699 ngadto sa P999. Mas mahal na kon nagkinahanglan ka og mas paspas nga koneksiyon.
Di lang resorts, hotels, kan- anan ug tindahan ang nagkinahanglan og wifi. Ang ubang mga kompaniya nagkinahanglan sab og wifi alang sa mas paspas nga komunikasyon sa ilang mga kawani. Bisan ang kabalayan mas nindot puy-an kon may wifi. Nga nahimo na ganing mas mapuslanon kay sa karaan nga landlines. Sa hotel nga among giabtan sa Quezon City sa niaging semana, mas daghan nang sud sa pakete nga gihatag sa front desk: Yawe sa kuwarto, breakfast coupons ug password sa ilang wifi. Nga labihan kakomplikado. Gawas sa lisod timan- an nga password, kinahanglan pa gyong mosuwat sa mas lisod nga login name. Di kay kana ra. Usa ra ka gadget ang makasud sa usa ka higayon. Kon nakauna pagsud ang cellphone, bangilan nang laptop.
Di sama kalisod ang wifi sa SM City dinhi sa ato. Apan puwerteng hinaya ug magsige’g kapawong. Mas kasaligan ang wifi sa Maribago Bluewater, Shangrila ug Waterfront Lahug ug, segun sa lokal ug langyawng mga turista, sa mga plaza sa Argao ug Boljoon sa habagatang Sugbo. May mga negosyante hinuong nabiyaan sa panahon. May mall nga nagbutang og wifi apan wa pahibaw-ang mga kustomer asang dapita kay maikog sa ilang coffee shops nga nagtanyag og wifi nga may password. May dagkong hotels nga dako gihapon kaayo’g bunal sa ilang wifi.
Apil sa bagtok og panghunahuna maong tagduma sa Mactan-Cebu International Airport. Nga dakong baligho kay maoy una ug kataposang mapahimutangan sa mga bisita sa Sugbo ug ang general manager, Nigel Paul Villarete, online 24/ 7. Pasalig silang butangan og libreng wifi sukad pa sa una, bisan niadtong si LTFRB 7 Director Ahmed Cuizon pay tigpamaba, apan hangtod karon way bisan gamayng lama sa wifi nga igkita.