Unsay imong Halad?
Piyesta na sab. Sa labing daghan nga libreng pangalagad. Kon motampo ka, mas daghan ang maalagaran, matambalan, mapakaon, matudloan ug matabangan. Atol sa Grand Halad sa Kapamilya ( GHSK) tibuok adlaw karong Sabado, Hunyo 30, sa main campus sa Cebu Normal University ( CNU) sa Osmeña Blvd. sa kinapusoran sa Dakbayan sa Sugbo.
Ang sentro sa GHSK, sama sa naandan, mao ang libreng tambal nga balor og kapin sa P100,000 gikan sa ABS- CBN Foundation ug Bantay Bata 163 ug mga pangalagad medikal sa matinabangon nga mga tambalanan, mga doktor, mga buhatan sa gobyerno, relihiyuso nga mga pundok, civic clubs ug ubang kahugpongan.
*** Dul-an sa 20,000 nga mas nagkinahanglan natong mga Kapamilya ang gitinguha nga masilbihan sugod sa alas-6 sa buntag hangtod sa alas-5 sa hapon sa dagko ug hamugaway nga hawan, gym, classrooms ug training halls sa CNU. Sila ang labing masakiton, labing nagkalisudlisod ug labing tabanganan nga mga molupyo sa Sugbo ug kasilinganang mga lalawigan.
Hinaot nga makatabang ka paghimo sa GHSK karong Sabado nga mas sadya ug mas mapuslanon nga kapiyestahan sa nagbaha nga mga pangalagad. Kon makahigayon ka, palihog basaha kining pasiuna nga listahan (tinyurl.com/halad) sa kumpirmado na nga mga pangalagad aron matabangan sa paghunahuna unsa pa ang dugang ikatanyag.
*** Gawas sa libreng konsultasyon ug tambal, dunay libreng minor surgeries (alang sa gagmayng hubag), libreng laboratory services (x-ray, CBC, urinalysis, RBS), libreng ibot sa ngipon, libreng mga antipara, libreng notaryo ug tambag sa mga abogado, libreng veterinary services (bakuna, kapon, purga, ECG, CBC, derma ug grooming sa mga iro ug iring), libreng masahe ug libreng pag- ayo sa cellphones, personal computers, motorsiklo ug mga bomba sa tubig.
May libre sang seminars (job search, digital photography, basic financial literacy, problem coping, call center training, pasiuna sa IELTS, basketball, volleyball, football ug running clinics ug Hosting101). May ipanghatag sang libreng mga libro alang sa mga tinun-an ug mga duwaan alang sa mga bata.