Suporta ni Noynoy
Tungod sa iyang popularidad, makatabang ang suporta ni Presidente Noynoy Aquino sa mga kandidato sa Sugbo sa piniliay sa Mayo sunod tuig. Tungod sa malampuson nga pagduso sa kampanya batok sa pangurakot, ang lokal niyang mga kandidato kaduhigan sa kaligdong nga hangtod karon, duha ka tuig human niasumir sa gahom, napatigbabaw sa pamunoang Aquino.
Laing bahin sa suporta sa presidente, ug mao ni hinungdan nga maglumba ang mga politiko pagbalitok ngadto sa partido sa administrasyon, mao ang gamhanang makinarya sa kampanya. Nga kasagaran maglakip sa kinatibuk- ang burukrasya ug panudlanan sa gobyerno. Apan si Aquino wa mopakita og timaan pagpadayon ning lang-og nga tradisyon sa mga nag-una niya sa katungdanan.
*** Niadto pa lang Sabado pormal nga ginganlan ni Aquino ang iyang mga piliunon pagka gobernador ug bise gobernador sa Sugbo—silang JunJun Davide ug Agnes Magpale. Mga tigpaluyo ni Davide nagtinguha unta nga mas sayo pang armasan ni Aquino ang ilang pundok. Aron makabuylo na sa paghagit sa dul-an sa duha ka dekada nang pagdominar sa mga Garcia sa politika sa Sugbo.
Apan mingaw pa sa tirana ang tubag sa Malakanyang. Wa itudlo si Davide og katungdanan nga mamahimo untang sukaranan pagpahinumdom sa mga Sugbuanon nga mas takos siyang tagduma sa lalawigan. Maong si Davide, nga hilumon ug mapanagan-on nang daan, wa maglangas bisan sa pag-apura sa iyang mga dumadapig.
*** Mas abunda ang mga timaan nga si Aquino di ganahang mohatag og dugang mga pabor sa iyang mga piliunon. Gawas sa pagtambong sa ilang birthday parties ug paglamano ug pag-isa sa ilang mga kamot. Wa siya mamalit og mga boto niadtong 2010. Kumbinsido tingaling makadaog sang iyang mga dumadapig nga way kuwartahay sunod tuig.
Maong ang mga dumadapig ni Davide sa pribadong sektor naningkamot pagtapak sa dakong haw- an sa pagpalihok og kampanya nga makaambas sa gilubasan nang organisasyon sa mga Garcia. Kahibawo sila unsay nakaluok sa kandidatura ni Davide batok ni Gobernador Gwen Garcia duha ka tuig ang nilabay.
Usa sa nitambong sa birthday party ni Danao City Vice Mayor Ramonito Durano III niadtong Sabado, si Consolacion Mayor Teresa Alegado, makasulti unsay pabor nga mapaabot sa mga sakop sa Liberal Party (LP) gikan sa Malakanyang: Iyang bana usa sa labing una nga gikiha og tax evasion ni Commissioner Kim Henares sa Bureau of Internal Revenue.
Bisan ang pakigpung ni Aquino sa Danao tulukibon. Gigamit niya ang okasyon pagpasidaan sa mga mayor sa Agusan del Sur nga gidudahang nakigkonsabo sa illegal logging. Gipasidan-an bang mga Durano ug ubang bag-ong mga sakop sa LP? Nga di silang kapaabot og proteksiyon gikan sa iyang pamunoan kon mangahas sa paggamit sa ilang katungdanan aron pagpaburot sa pribado nila nga mga panudlanan?