Si Pope Francis sa Sugbo

Gipalili na tang daan ni Pope Francis sa unsay iyang ganahan nga duawon sa Sugbo kon mahinayon siya pagtambong sa ika-51 nga International Eucharistic Congress karong tulo ka tuig gikan karon. Mahimong iyang duawon ang labing kabos nga mga

1. Nagpuyo uban sa nagbuntaog nga mga basura sa White Road sa Inayawan;

1. Naglatay-latay sa lipak nga agianan sa kabalayan nga naglutaw sa dagat sa Ermita ug Pasil ug Mambaling;

2. Nagbaligya sa ilang dungog samtang nagbanig og karton sa labing lapukon nga bahin sa Kamagayan;

3. Nagpasilong sa mga barungbarong nga nag-umbaw ug busa maoy labing suki sa baha sa Mahiga; ug

4. Nag-ugmad sa yuta sa bukirang mga barangay aron lang tukbon sa hakog nga mga komprador sa patag.

***

Mahimong duawon niya silang tanan. Aron pagsimbolo sa direksiyon sa iyang pamunoan pagpaduol sa Simbahang Katoliko ngadto sa labing kabos nga mao ang kinabag-an sa katawhan. Bugtong babag sa iyang pagpakig- uban sa tanang kabos sa Sugbo mao ang panahon. O ang kakuwang ini.

Di siya mahimong babagan sa kadagkoan sa Artsidyosesis sa Sugbo. Nga ambot kanus-a kataposan nga nakasusi sa aktuwal nga kahimtang sa mga kabos nga maoy labing nagkinahanglan sa ilang giya ug presensiya. Kay sud na sa daghan uyamot nga katuigan igo lang gipahinungdan og taphaw nga simpatiya ug pasidungog sa pinalutaw nilang mga wali.

*** Silang Arsobispo Jose Palma ug kaubanan padayong nagpakabuta-bungol sa mga sanglitanan sa kayano nga gipasundayag sa Santo Papa sukad pa sa labing unang mga gutlo sa iyang pag-asumir sa labing taas nga katungdanan sa Vatican. Padayong nagtungkawo sa luho nilang mga palasyo ug mga kumbento. Padayong nagkabayo sa luho nilang mga sakyanan. Ug padayong nagpabusdik sa luho nilang mga kinabuhi.

Pipila sa mga pari wa pa ganing kaila ni Pope Francis sa dayong tapos sa ilang mga misa. Usa gani nila way kukaikog nga nipadayag gyud og pagduda sa katinuod sa pagpuyo niya og yanong apartment ug pagsakay niya og buses.

***

Ato ning klaruhon. Kinabag-an sa mga pari sa Sugbo ligdong ug buotan. Ang uban gani way klarong pinuy-anan ug labaw nang way sakyanan. Apan wa ning kababag hinunoa nakatabang pa gani nila sa tinuoray nga pagtuman sa pagsangyaw sa maayong mga pagtulon-an sa simbahan.

Pipila lang sa kaparian ang nasaag. Nag-isip sa ilang sotana nga lisensiya sa pagpahimus. Wa magkuwang sa pagawhag sa mga gamhanan ug mga adunahan sa pagtabang sa mga kabos. Apan sila mismo naglunang sa gahom ug bahandi nga hawa sa bisan unsang pagsuway sa pagtuman sa ilang kaugalingon nga mga sermon. Kon di mag-usab sa ilang kamaot sila ang labing bakikaw kon mahinayon ang pakighimamat ni Pope Francis sa wa nila tagdang nangantod ug timawa nga mga Sugbuanon karong 2016.