Nganong di dutlan sa balaod
Gitanggong si Cristiniano Palabrica sa selda sa City Traffic Operations Management ( Citom). Siyay drayber sa mini- bus nga nahagbong sa pangpang sa Barangay Quiot. Naangol ang 20 sa iyang mga pasahero, kasagaran mga batan- on, nga motambong unta sa kalihokan nga gipasiugdahan sa Sangguniang Kabataan ( SK) sa Basak Pardo. Salamat na lang nga way namatay.
Sa pikas nga bahin, silang Reynan Bermejo ug Rolito Gilo nagpabiling gawasnon. Bisan silay mga kapitan sa nagbangga nga MV St. Thomas Aquinas ug MV Sulpicio Express Siete. Sa labing uwahing ihap 75 na ang namatay sa trahedya. Gikahadlokang patay na sab ang 45 ka pasahero ug tripulante nga nagpabiling missing pito ka adlaw human sa trahedya.
- o0o-
Si Palabrica gisukitsukit dayon human sa hitabo. Gawas nga maoy gitulisok nga sad- an sa pagkahagbong sa bus ug gipasanginlan nga nagtersera sa pagtungas sa bukid maong napawong ang makina, niungot ang manobela ug naharos ang brake, gisusi pa gyod wa ba makainom o makahithit sa ilegal nga drugas.
Silang Bermejo ug Gilo wa pa masukitsukit ni bisan kinsang imbestigador sa gobyerno usa ka semana na human sa bangga sa mga barko. Igo lang gipasumiter sa ilang marine protest, ang nagkasungi nilang mga bersiyon sa panghitabo. Way bisan usa nga nagpakabana pagsusi nakainom o nakahithit ba samtang nanimo sa ilang tagsatagsa ka barko.
- o0oGitanggong si Palabrica bisan kon ang kadaot nga namugna mao rang pagkagguba sa bus, pagka- ospital sa naangol nga mga pasahero ug pagka- kanselar sa tibuok adlaw nga seminar sa pagpanalipod sa kabataan.
Gibungulbungolan ang mga awhag nga tanggungon silang Bermejo ug Gilo bisan sa pagkamatay, pagkaangol ug pagkahasol sa kapin sa 800 ka pasahero ug tripulante, pagkalunod sa usa ug pagkagusbat sa ikaduhang barko ug pagkamugna sa labing menos P6.5 milyones nga kadaot sa katunggan sa way paghisgot sa pagkamatay sa mga isda ug mga kinhason, sa pagkahugno sa mga panginabuhi sa mga mangingisda ug sa seryusong pagkahulga sa kahimsog sa mga molupyo.
-o0o- Si Mayor Adelino Sitoy sa Cordova, nga maoy labing grabeng naigo sa oil spill gikan sa nalunod nga MV St. Thomas Aquinas, nitataw nga mahimo nang pasakaan og mga kasong kriminal silang Bermejo ug Gilo ug ang ilang mga kompaniya. Matod niya di na kinahanglang paabuton nga mahuman ang imbestigasyon sa Philippine Coast Guard ( PCG) ug Maritime Industry Authority (Marina).
Giawhag ni Sitoy ang iyang kaubanang mga abogado sa pagtabang sa mga biktima sa trahedya pinaagi sa paghipos sa mga ebidensiya ug mga testimoniya nga makapalig-on sa mga kasong ipasaka sa piskaliya. Nipasabot si Sitoy nga nagpabilin ang gahom sa kapolisan ug sa National Bureau of Investigation (NBI) pagsusi sa bangis nga mga krimen bisan sa pagbabag sa PCG ug Marina.
-o0o-