Political will

Nakabantay ko nga daghang kawani sa Cebu City government, ilabi na kadtong nadistino sa City Hall, nga maglakwatsa ra atul sa oras nila nga tingtrabaho.

Kapin na gud sa napulo ka tuig nga nadistino ko sa City Hall mao nga makaila g’yud ko sa panagway sa kadaghanan sa mga kawani. Moduko lang ang mga hingtungdang kawani kon akong masugatan.

Ang uban ‘sab anha maglingkod palibot sa City Hall nga walay mga trabaho. Pastilan, mora’g alang kanako gausik-usik lang kini sila sa gisweldo kanila sa kagamhanan sa dakbayan.

Abi ninyo og nganong sayon-sayon ra sila nga makalakwatsa? Wala na estriktoha ang pagpatuman nga ang tanang kawani sa dakbayan magsul-ob gayud og identification cards atul sa oras nga tingtrabaho.

Tan-aw nako mora’g wala ‘sab kaayo’y gana si Mayor Michael Rama nga mopatuman sa estrikto nga pagsul-ob og ID kay bisan gani siya makadaghan man nako mabantayi nga wala na magsul-ob og ID.

“Leadership by example” man gud unta. Kon makita sa mga kawani, ilabi na kadtong mga suod kaayo sa mayor, nga si Rama wala magsul-ob og ID, aw gisundog usab nila.

Ako gani nga pwerteng dugaya na nga nadistino sa City Hall og nailhan na sa daghang mga opisyal ug kawani magsul-ob man g’yud og ID.

Maayo unta og pinaagi niining lindog, ipatuman na sa mayor ang kampanya batok sa mga kawani nga ligoy, unya estrikto na g’yud nga ipatuman ang pagsul-ob og ID.

Nagduha-duha ko pagtoo nga mapatuman sa mga sakop sa Reduce Danger Zones (ReDZ) ang kampanya batok sa mga tawo nga nagtukod og building ug panimalay daplin sa kasapaan.

Apan nindot kaayo kining ilang lakang kon hingpit lang nga mapatuman og angay kini nato nga suportahan. Ambot unsaon kaha nila pagpatuman nga kining mga tag-iya og building nga anaa sa daplin sa kasapaan mosukol man kini og away sa korte.

Kini ‘sab nga mga tag-iya og kabalayan nga gitukod daplin sa kasapaan modangop man kini sila sa korte aron langaylangayon ang pagpatuman. Bana-bana nako, mahuman na lang kining ikaduhang termino ni mayor Rama dili pa maguba kining mga building nga anaa gitukod daplin sa kasapaan.

Maabtan na lang ‘sab sa kampanya alang sa umaabot nga eleksyon unya sa 2016, samot nga dili na usab mapatuman kay molugak man ang dakbayan tungod sa politika.

Maayo kay gipalapdan na gayud sa Department of Public Works and Highways ang usa ka bahin sa aseras diha sa Salinas Drive gikan sa eskena Archbishop Reyes Avenue.

Wala na lang ‘sab mosukol ang mga lumulopyo nga “sapsapan” nila ang kabahin sa ilang panimalay aron mapalapdan ang aseras. Tukma ang gihimo sa maong mga lumulopyo nga wala na lang mangita’g broka.

Kon mahuman na ang pagpalapad sa aseras, atong awhagon ang City Hall nga estriktohon gayud ang pagdili sa mga mapahimuslanong lumulopyo nga gamiton ang aseras sa ilang personal interest.

Daghan sa mga lumulopyo diha nga bisan gamay pa kaayo ang aseras apan gigamit nila kini nga kabahin sa ilang tindahan ug panimalay. Resulta ang mga tawo anha na molakaw sa karsada og makapahinay kini sa dagan sa mga sakyanan.

‘Nagduha-duha ko pagtoo nga mapatuman sa mga sakop sa ReDZ ang kampanya batok sa mga nagtukod og building ug panimalay daplin sa kasapaan’

Pwerteng dugaya nahuman sa pagpalapad sa tumoy nga karsada sa M.Velez Street paingon sa Kapitolyo. Gitakda unta kini nga humanon kaniadto pa’ng 2011 apan karon wala pa gihapon mahuman.

Wala pa gani nila maputol sa DPWH kanang daku kaayo nga kahoy nga anaa nagbabag duol sa taytayan. Kon putlon na sa DPWH ang maong daku kaayo nga punoan sa kahoy makatabang kini pagpaminus sa trapiko diha sa maong dapit.

Kanunay ko nga mag-agian sa maong karsada mao nga suheto kaayo ko diha ug nakabantay ko nga bisan og nakamugna na og “riprap” ang DPWH didto sa sud nga bahin apan duna pay mga balay nga nagpabilin nga anaa sa daplin sa karsada.