Pagbangon sa edukasyon sa Norte

Paypay Elementary School, Daanbantayan, Cebu — Ug naatopan gyud namo ang classrooms nga apil sa labing nagusbat sa bagyong Yolanda. Mga magtutudlo ug mga tinunan sa Don Bosco Technological Center ( DBTC) nga gipangulohan sa ilang administrador nga si Padre Boni Bacatan ug boluntaryong mga panday sa Sugbo ug Bohol ang nagtinabangay sa pagbutang og bag-ong atop ug kisame ginamit ang construction materials nga natigom sa Kapamilya Relief Campaign.

Giapas sab dayon og pintal sa among kaubanan sa ABSCBN Cebu ug ubang mga boluntaryo ang bungbong, pultahan ug bintana sa classrooms. Pulos hinatag sa manggihatagon nga mga Kapamilya ang among gida nga pintal ug ubang construction materials.

*** Kapin sa 600 ka mga tinun-an ug mga ginikanan ang nakapahimus sa libreng konsultasyon ug mga tambal sa Emergency Rescue Unit Foundation (ERUF). Labing menos 30 ka doktor nga gipangulohan ni Dr. Pek Eng Lim ang nisusi sa kahimtang sa panglawas sa mga pasyente.

Nanghatag sab ang ERUF og mga duwaan ug backpacks alang sa mga tinun-an. Pormal sang gitunol ni Dr. Lim ang 30,000 ka vinyl nga hinatag sa SM City Cebu ngadto sa prinsipal dinhi nga si Rommel Compuesto. Gihangop sa mga tinun-an ug mga magtutudlo ang mga hinabang nga makahimo nang mas nindot tumban ang sawog sa ilang classrooms.

*** Nikuyog sab namo dinhi ang mga Sugbuanon nga tua na magpuyo sa Australia. Kapin sa P200,000 ang ilang natigom gikan sa mga Pilipinhon ug mga Ustralyano nga mga parokyano atol sa mga misa sa ilang simbahan. Kay niduaw man sa ilang pamilya sa dakbayan sa Talisay sila ang gitahasan sa pagtunol sa hinabang ngadto sa ABS-CBN Cebu.

Gidapit namo sila sa pagpangunay pagpanghatag sa ilang nakompra nga school supplies alang sa mga tinun-an dinhi ug sa Alternative Learning System (ALS) Center nga tapad ra dinhi. Di matukib ang ilang kalipay sa mainiton nga paghangop sa mga tinun-an sa ilang hinabang.

*** Sinugdanan lang ni sa kabos namong tampo sa pagbangon sa amihanang Sugbo gikan sa lapad nga kagusbat nga gibilin ni Yolanda. Nipasabot si Tata Cinco-Sy, station manager sa ABS-CBN Cebu ug Visayas Cluster Head, nga pag-ayo sa nangaguba nga mga eskuylahang publiko ang mamahimong sentro sa umaabot namong kalihokan. Matod ni Sy dason ni sa nakabuylo nang pagpanghatag og mga bangka alang sa mga mangingisda sa silangang Kabisay-an.

Si Lutis Cimafranca sa Bantay Bata 163 Cebu nipahibawo nga padayon nila gisuhid ang mga dapit sa amihanang Sugbo nga kinahanglang tukoran og bag-ong school buildings. Nakatukod na ang ABS-CBN Sagip Kapamilya Foundation og school buildings sa mga dapit sa Negros Oriental nga labing nagusbat sa linog ug nagplano sab pagtukod og school buildings sa Metro Cebu ug Bohol.

*** Email: leo_lastimosa@abs-cbn.com