Ebidensiya sa pork
Atubangan sa nag-alintabo nga panagsungi tali sa tulo ka senador ug sa mga nangangkon nga nagpasiugda sa P10 bilyones nga pork barrel scandal, nakadapit sa pagtagad sa nasud ug sa katawhan ang pasiunang mga ebidensiya nga nidason sa mga pamahayag sa labing menos duha ka whistleblowers:
• Mga dokumento sa Anti-Money Laundering Council (AMLC) nidason sa pasangil ni Benhur Luy nga, ubos sa sugo ni Janet Lim Napoles, nihatag siya og P20 milyones ngadto ni Ruby Tuason niadtong Septiyembre 18, 2008; samtang
• Pasiunang footage sa closed circuit television (CCTV) camera sa Senado nimatuod sa pangangkon ni Tuason nga niduaw siya sa buhatan ni Senador Jinggoy Estrada sa ikaunom nga andana niadtong Nobyembre ug Disyembre 2008.
***
Napamatud-an sa mga dokumento sa AMLC ang pangangkon ni Luy nga iyang gilista ang mga petsa, mga kantidad sa kuwarta, mga tawo nga gipanghatagan ug mga dapit nga nahitaboan niadtong katuigan nga hingpit pa siyang gisaligan ni Napoles, ang gipasanginlang rayna sa pork barrel, pagduma sa dakong bahin sa ilegal nilang operasyon.
Makapasamot ni og kaapiki sa laing whistleblower, si Dennis Cunanan sa Technology Resource Center (TRC), kinsa niinsistir nga wa kakuwarta sa kickback sa pork barrel. Apan si Luy nitataw nga siya ang nagsud og P960,000 sa paper bag ug nga siyay nakakita ni Cunanan nga nagbitbit sa bag dayong gawas sa buhatan ni Napoles.
***
Sa pikas nga bahin, ang CCTV sa Senado nitakdo sab sa pangangkon ni Tuason nga nagbalikbalik siya sa buhatan ni Estrada aron paghatod sa iyang bahin sa pork barrel. Nabantang sa footage nga bag ang gibitbit ni Tuason, di tray o karton sa init nga pansit ug sandwiches suma sa sumbalik ni Estrada. Katulo nakit-an sa CCTV si Tuason:
• Niadtong Nobyembre 17, 2008, naglakaw si Tuason sa main lobby ug nisaka paingon sa ikaunom nga andana;
• Niadtong Nobyembre 19, nigawas siya sa elevator sa ikaunom nga andana sa alas-2:33 sa hapon ug nibiya sa building agi sa main lobby sa alas-4:49 sa hapon; ug
• Niadtong Disyembre 18, si Tuason nisud sa main lobby sa alas-3:42 sa hapon ug nisaka paingon sa ikaunom nga andana.
***
Mapabuslot hinuon sa pangangkon ni Tuason nga kinahanglan pa siya nga mobaligya sa iyang bay aron makauli sa P40 milyones nga iyang nadawat nga komisyon sa pork barrel ang nahibaw-an sa AMLC nga duna siyay 80 ka bank accounts. Wa pa hinuon matino ang kinatibuk-an niyang kuwarta sa bangko.
Wa pay katin-awan nganong kinahanglan siyang molarga paingon sa Los Angeles sa Estados Unidos nga ang igbabaligya niyang bay naa man sa Dasmarinas Village sa Dakbayan sa Makati. Wa say paagi pagtino P40 milyones ra ba gyoy iyang nabolsa.