Kalainan sa mga reklamo
Kon sama sa kasagaran sa mga motorista ug mga pasahero gisapot ka na sa kalangay sa trapiko tungod sa nagkadungan nga mga trabaho pag-ayo sa mga kanal ug kadalanan sa Metro Cebu, palihug ginhawa og lawom. Pasalamati ang imong mga bituon. Nga inay magreklamo sa kadalanan nga napasagdan, nga maoy atong naandan sa nangaging katuigan labi na ubos sa nangaging mga pamunoan, nagbagulbol na ta karon sa sunudsunod nga pagtrabaho.
Pero ato ning klaruhon. Samtang magpasalamat ta nga gitrabaho inay gipasagdan ang atong mga kanal, kadalanan ug taytayan, di sab angayng patakaan lang ang pagpatuman sa mga proyekto. Kinahanglan gihapon ta nga pahibaw-on. Kon di man konsultahon.
*** Nabantang ang dakong kalainan sa kalidad sa bag-ong mga reklamo kon itandi sa karaan ang pagkisikisi sa pipila ka dagkong negosyante sa Sugbo sa gitakdang pagtrabaho na unta karong semanaha sa Serging Osmeña Street duol sa pantalan sa dakbayan sa Sugbo.
Palihug ayaw saypa sa paghubad. Apan kanindot paminawon sa reklamo sa mga tagduma sa higanteng shopping mall, kompaniya sa barko ug hotel nga magsugod nang trabaho nga way konsultasyon ni igong lugway sa pahibawo nga wa sila makapaandam sa ilang mga kustomer. Kadako sa kalainan sa karaang mga reklamo nga gipasagdan lang ang dagkong libaong sa mahinungdanong agianan.
*** Susamang reklamo ang gipadayag, apan kay di man sama kadagko ang mga nitiyabaw (gawas nga way mayor nga nangadlawon pagsuhid sa panginahanglan sa mga proyekto) wa makadawat og makiangayon nga pagtagad, dihang dungan nga gisugdan ang pag-ayo sa flyover sa Maguikay ug ubang dagkong kadalanan sa Dakbayan sa Mandaue.
Uwahi nang nisibaw ang mga reklamo sa mga naigo sa pataka nga trabaho sa kadalanan sa dakbayan sa Lapu-Lapu. Nakabuylo nang trabaho ug nahinayak nang lokal nga mga opisyal sa hingpit nga pagpabaya sa wa kinahanglana ug kaibanan unta kon di man hingpit nga kalikayan nga higanteng pagkabara sa mga sakyanan.
*** Sa di pa magtuo ang kadagkoan sa Department of Public Works and Highways (DPWH) ug pribadong mga kontraktor nga ulug- ulog ni nila angay silang makat- on sa mahinungdanong mga leksiyon ning pagkuwestiyon sa mga magbubuhis sa ilang trabaho:
• Una, di na mangiyugpos ni magpakahilom ang katawhan sa pagpatuman o labi na sa wa pagpatuman sa mga proyekto;
• Ikaduha, angay silang mopahibawo sa nag-ung-ong nilang mga proyekto ( mas maayong usa ka buwan ang lugway) aron makaandam ang lokal nga mga opisyal og kausaban sa ruta ug alternatibong mga agianan ug aron nga di mangasaag ang mga motorista ug mga pasahero; ug
• Ikatulo, angayng pahibaw- on gyod ang mga negosyante, labi na kon dako og tampo sa kampanya sa mga mayor, may nag-ung-ong nga dakong sale ug may politikong ganahang mopagawal sa gahom.
*** leo_ lastimosa@ abs- cbn. com