Sayong pagpapas ug pag-uli

Human sa sunudsunod nga kapildehan sa Miami Heat, kampeyon sa National Basketball Association ( NBA) sa duha na ka sunudsunod nga tuig, masabot kaayo ang dakong kahimangod ni Lebron James sa Twitter dihang napapas ang tanang sud sa iyang cellphone. Way detalye unsay nahitabo apan kay endorser man si James sa Samsung nikatap dayon ang mga pangagpas nga telepono sa higanteng kompaniya sa South Korea ang sad- an.

Human sa pila ka gutlo, gipapas ni James ang iyang tweet ug gipulihan og laing tweet nga nahibalik nang tanang napapas. Way detalye unsay nahitabo apan nibaha ang mga pangagpas nga may nakahunghong ni James sa negatibong implikasyon sa multi-milyones dolyares niyang kontrata sa Samsung.

Nahadlok ko nga di si James ang una ug kataposang biktima sa kalit nga pagkawagtang sa mahinungdanong kasayuran sa cellphones. Apan masaligon ko nga human sa pila ka gutlo nga pagkarakara, salamat sa samang teknolohiya nga nakahasol sa kamalinawon sa ilang panghunahuna, sayon rang makuha pagbalik ang bisan unsang nawa nila.

Human sa pasiunang kahimangod sa tweet ni James nga nabasa sa minilyon niya ka sumusunod, mahimong naginhawa na og luag ang kadagkoan sa Samsung. Napamatud-an sa daghang pagtuon nga bisan sa daghang pakauwaw sa endorsers, mas dako ug mas malungtaron ang ilang natabang sa mga produkto.

*** Balik ta sa yuta. Kitang kasarangan nga mga konsumidor di makapaabot nga may kadagkoan sa mga kompaniya nga naghimo sa atong cellphones nga motabang kon kitay maapiki. Bugtong konsuylo mao nga ang bisan unsang kasaypanan nga mahimo, salamat sa kasayon usbon ug maniobrahon sa cellphones, sayon ra sab kaayong mabawi.

Kon ang imong cellphone maka-surf og internet, dako ang kahigayonan nga ang tanan nimong contacts, video, letrato ug uban pa may backup na sa cloud. Kon imong gitugotan ang higanteng servers sa Apple (iOS) ug Google ( Android) pagkopya sa tanang kasayuran sa imong cellphone, sila ra say mouli sa bisan unsang kasayuran nga mapapas.

Nga mahimong maoy nahitabo ni James. Samsung o iPhone man ang responsable, bugtong gikinahanglan mao ang pag-reboot sa cellphone. Human sa pila ka gutlo, mabalik nang tanang napapas nga kasayuran nga mora og wa lay nahitabo.

Mas angayng kabalak-an ni James unsaon pagputol ang lima ka sunudsunod nilang kapildehan sa kataposang unom ka duwa. Sa akong pagsuwat ini, mao pa gyoy pagkapilde nila sa Denver Nuggets sa ilang kaugalingong home court sa American Airlines Arena. Sa imong pagbasa ini, nahuman na ang ilang duwa batok sa nanung nga Houston Rockets. Laing suliran ni James ang padayong pagtumpi ni Kevin Durant sa Oklahoma City Thunder sa mga hinungdan nganong siyay MVP sa NBA karong tuiga. Ug hinaot di mataligam-an ang padayong paghapuhap sa abaga sa mga taga Samsung.

*** Email: leo_ lastimosa@ abs- cbn. com