Laktod nga demolisyon
Kay kuyaw man nga di kapugngan ang tanang 51 ka nag- ung- ong nga demolisyon sa kaliboan ka kabalayan sa pribadong mga luna sa Dakbayan sa Sugbo, mas dinalian karon ang panginahanglan sa pagsusi ug pag- andam sa tanang relocation sites nga gipanag- iya sa dakbayan.
Samtang nag- imbentaryo ang bag- ong Task Force Land for the Landless nga gipangulohan ni Bise Mayor Edgar Labella sa tanang luna nga gipanag-iya sa dakbayan, mas dinalian ang tahas sa Division for the Welfare of the Urban Poor ( DWUP) nga giduma ni Atty. Collin Russell. Kinsa giawhag sa Cebu City Council pagsumiter sa lista sa tanang relocation sites nga napalit sa nangaging mga pamunoan sa City Hall. Nakadawat og makahasol nga kasayuran si Konsehal Alvin Dizon, tsirman sa Committee on Housing, nga labihang daghana sa relocation sites nga napalit sa pamunoan ni kanhi mayor Alvin Garcia. Apan kasagaran sa mga luna di haom nga puy- an sa mga molupyo nga maigo sa mga demolisyon. Sa labing uwahing ihap, niabot og 100 ka luna sa pito ka relocation sites ang di mahimong tukoran og mga panimay.
Matod ni Dizon angayng susihon sa DWUP tinuod bang may relocation sites nga naa ngilit sa lawom nga mga pangpang ug tua sa tumoy sa tag-as nga bukid. Hinaot nga maapil pagtino sa DWUP unsay mga sukaranan sa pagpamalit sa gikuwestiyon nga mga luna. Duna bay nangahente? Ug duna bay naka- ginansiya sa mga transaksiyon? Tinubdan sa kahimangod nilang Dizon ug ubang mga konsehal mao ang kapakyas pag- andam sa pipila ka relocation sites nga di unta kaayo layo sa panginabuhi sa mga molupyo nga kinahanglan nang balhinon. Apan hangtod karon wa pa mabutangi sa labing batakan nga panginahanglan — sama sa pagkutay og mga linya sa tubig ug kuryente ug paghimo og kadalanan.
Nga lisod sabton. Kay wa magkuwang og kuwarta ang City Hall alang sa katuyoan. Matod ni Dizon nakagahin na ang City Council og P50 milyones alang sa site development projects sa niagi pang tuig 2013. Gibahin ang pundo sa duha ka distrito sa dakbayan — P20 milyones sa habagatan ug P30 milyones sa amihanan. Samtang angayng pangandaman ang nag- ung- ong nga mga demolisyon, sakto si Mayor Mike Rama sa pagdumili pagtahan sa pagpanalipod sa mga molupyo sa dakbayan nga naigo sa kuwestiyonable nga mga pangangkon sa pagpanag-iya sa mga luna nga dugay na nilang gipuy- an. Salig kong Atty. Jade Ponce, pangu sa City Land Management Council, sa pagpalawom sa pakisusi sa mga pasangil nga may naglihok nga gamhanang sindikato sa yuta.
Angay sang pasidunggan ang mga paningkamot ni Labella pagpahinumdom sa mga hukmanan nga di angayng laktawan ang batakang panginahanglan sa relocation sa di pang demolisyon nga gitakda sa Urban Development and Housing Act (UDHA).