Bentaha sa kaligdong
Kon niulbo pa ang P10 bilyones nga pork barrel ug P23 bilyones nga Malampaya scandals atol sa pamunoan ni kanhi presidente Gloria Arroyo, ang mosunod maoy posibleng mahitabo:
Yak-an sa buhatan sa Ombudsman, ubos sa nangalisbo nga pagduma ni Merceditas Gutierrez, sud sa daghang katuigan ang mga kasong plunder nga gipasaka batok sa mga gilambigit sa P33 bilyones nga kahiwian; Di mopakita sa mga imbestigasyon sa Kongreso ang mga opisyal nga nagmaniobra sa mga transaksiyon kay ginapos sila sa ilegal nga pagpugong ni Arroyo sa tanang imbestigasyon sa dagkong mga opisyal sa gobyerno ug militar (Executive Order No. 464); ug Tanang kalapasan sa pamunoang Arroyo duphan sa Korte Suprema ubos sa pagduma sa gipalagpot nga chief justice, Renato Corona.
Kon si Arroyo pa ang nagtungkawo sa Malakanyang, kadudahan pa gani kon mahibaw-an ba sa katawhan ang labing dakong kawat sa buhis sa atong panahon. Kay ang whistleblower nga si Benhur Luy naluwas lang kay ang bag-ong natudlo nga labing dagkong mga opisyal sa National Bureau of Investigation (NBI) wa pa maapil sa payroll sa gipasanginlang rayna sa pork barrel nga si Janet LimNapoles.
Labaw nga way seguro kon makaabot bang mga kaso sa Ombudsman. Kay ang mga liderato sa Department of Justice (DOJ) ug NBI nga tinudlo ni Arroyo napamatud-an sa makadaghang higayon nga mas ganahang moyango sa iyang gusto kay sa pagpatigbabaw sa balaod.
Usa lang ni ka aspeto sa nagpadayong kampanya batok sa pangurakot nga makapalili nato sa dakong bentaha nga ligdong ang liderato sa Malakanyang. Magmata lang unta ta og buntag kon ang labing dagkong mga opisyal sa gobyerno nagkonsabo pa sa pagbolsa sa atong hinagoan nga buhis, inay manggukod sa mga nitulis nato sa atubangan.
Napamatud-an sa siyam ka tuig nga pamunoang Arroyo ang kasayon ra diay natong tulison kon ang tibuok makinarya sa gobyerno gamiton sa kadaotan. Napamatud-an sa upat ka tuig nga pamunoang Aquino ang kamasaaron sa gobyernong naningkamot pagpatigbabaw sa interes sa katawhan.
Kay gawasnon nang nakahimo sa ilang trabaho ang nagkalainlaing mga institusyon sama sa NBI, DOJ, Ombudsman, Commission on Audit (COA) ug Korte Suprema, naapil na sa mga gipasakaan og kaso tungod sa kahiwian ang labing suod nga mga alyado ni Presidente Aquino ug nabaraw ang pagpatuman sa kuwestiyonableng mga balaod nga gipanday sa Kongreso ug gipatuman sa Malakanyang.
May sukaranan ang panghinaot nga magpadayon ang gawasnong pakisusi sa mga eskandalo bisan pa kon di mobakasyon ang labing gamhanan nga mga sinumbong. Apan mas dako ang sukaranan sa mga panghinaot nga milagrohan unta og kaikog silang Senador Juan Ponce Enrile, Senador Jinggoy Estrada ug Senador Bong Revilla ug mohunong na pagsabotahe sa pakisusi sa ilang mga transaksiyon.