Lista ni Napoles

Duha ray gihatagan sa kampo ni Janet Lim-Napoles og lista sa mga opisyal sa gobyerno nga gilambigit sa P10 bilyones nga pork barrel scandal: Si kanhi senador ug karon rehabilitation czar Ping Lacson nga gihatagan og parsiyal nga lista sa bana ni Napoles nga classmate ni Lacson sa Philippine Military Academy, si retiradong Marine Major Jaime Napoles; ug si Justice Secretary Leila de Lima nga gihatagan ni Napoles mismo sa kumplitong listahan.

Silang Lacson ug de Lima pulos nagdumili pagpakita sa ilang listahan ngadto sa publiko. Sa ato pa, pulos bakak ang mga listahan nga gipagawas sa ubang mga pundok ug mga indibiduwal. Labi na kon nahilambigit sa mga sinumbong sa kasong plunder nga girekomendar sa Ombudsman nga ipasaka sa Sandiganbayan.

*** Bisan sa pangangkon ni de Lima nga may mga ebidensiya nga gipataban si Napoles sa affidavit ug listahan, niinsistir siya nga kinahanglan pang susihon ang mga sukaranan sa paglambigit sa mas daghan nga mga ngan sa nangalisbo nga eskandalo. Nipasalig si de Lima nga nagsige na og susi ang National Bureau of Investigation sa katinuod sa lista ni Napoles.

Human sa pagsangyaw sa kadaghan sa mga naapil sa lista ug sa kadagko sa mga katungdanan nga ilang gihuptan hangtod sa pagkakumbinser ni de Lima nga may igo nang sukaranan sa pagbisto sa listahan, mamugna ang dakong haw- ang. Nga maoy makadasig sa mapahimuslanong mga sektor pagpabaha og bisan unsa na lang listahan.

*** May sukaranan ang pagduda ni de Lima di lang sa listahan ni Napoles kon dili hasta na sa mga pangangkon sa iyang pinirmahan nga affidavit. Bisan sa iyang pagangkon nga nitakdo ang affidavit ni Napoles sa nahaunang mga pamahayag sa whistleblowers, nipahibawo si de Lima nga makigtagbo siya sa whistleblowers sa pork barrel scandal karong semanaha.

Bisan naatol sa Semana Santa ang pagkumpisal ni Napoles niya, di mabasol si de Lima kon maglisod pagtuo nga gimilagrohan ang gipasanginlang utok sa eskandalo. Dako ang kahigayonan nga nanglawgaw na lang si Napoles human nabantang ang lig- ong mga ebidensiya batok niya.

Makatabang tingali nilang de Lima ug ubang mga imbestigador ang sulti ni Ombudsman Conchita CarpioMorales, nga retiradong mahistrado sa Korte Suprema: Igo na ang mga ebidensiya nga gisumiter sa prosekusyon aron pagkonbikto sa mga sinumbong. Sa ato pa, wa na kinahanglana nga himuong state witness si Napoles.

Kinahanglan gihapon hinuong susihon ang bag-ong kasayuran nga gibutyag ni Napoles. Labi na mahitungod sa mga transaksiyon nga direkta niyang giduma nga wa mahibaw- i sa whistleblowers. Apan unsaon man pagseguro nagsulti ba sa tinuod o namakak si Napoles? Salig ko sa kaligdong ug katakos ni de Lima. Atong bantayan nga di malubag sa gamhanang mga puwersa nagbirabira niya.