Lipat-lipat sa lista-lista
Karong nabisto na ang di lang usa, di lang duha kon dili tulo gyod ka listahan sa mga gilambigit sa P10 bilyones nga pork barrel scandal, nabantang nga may sukaranan ang panagana ni Justice Secretary Leila de Lima: Nga mosangpot lang sa kalibog kon ipagawas ang listahan nga way ipataban nga mga ebidensiya.
Ang nisulbong sa nasudnong kahinam sa paglili sa listahan gipulihan sa makapapugwat nga kaamguhan nga si Napoles, inay nga maoy magkapuliki sa pagpasabot sa nangalisbong mga transaksiyon nga iyang gipasiugdahan, mao na hinuon karoy nagpatuyang paghingan og mga ngan. Bahala na kon way ebidensiya kon dili kutob lang sa iyang nahinumdoman.
*** Gisugat sa lapad nga pagduda ang pagbisto sa duha lista ni Napoles: Una, ang lista nga gisumiter ni kanhi senador Panfilo Lacson sa Senate Blue Ribbon Committee; ug ikaduha, ang lista nga gihatag sa kampo ni Napoles ngadto sa mga sakop sa media.
Niinsistir ang kampo ni Napoles nga ang ilang gipagawas mao ang kopya sa lista nga gihatag ni Napoles ngadto ni de Lima niadtong Semana Santa. Apan gibarugan gihapon ni de Lima nga unya na isumiter ang lista sa Senado kon madawat na niya ang pinirmahan nga affidavit ni Napoles nga mag- detalye sa tanang transaksiyon ug tanang opisyal nga nahilambigit.
*** Mas abunda ang mga sukaranan sa pagkuwestiyon sa listahan nga giingon ni Lacson nga gitunol niadtong Marso sa bana ni Napoles nga si Jaime, classmate ni Lacson sa Philippine Military Academy ( PMA) Class ' 71: • Sa wa pa ipagawas ang listahan, nideklarar si Lacson nga apil si Senador Miriam Defensor Santiago, apan paggawas sa listahan wa si Santiago; ug
• Naapil sa listahan si Kongresista Gerald Gullas sa unang distrito sa Sugbo ug Senador JV Ejercito, nga pulos nakalingkod niadtong 2013, kanus- a gibisto nang Benhur Luy ang raket ni Napoles, nilapad nang nasudnong mga protesta batok sa pangurakot ug nga gibasura na sa Korte Suprema ang Priority Development Assistance Fund.
*** Daghan pang mokabayo sa kalibog sa eskandalo. Ang tinuod nga mga kawatan, nga nagkabulingit nang daan, di managana pagpanglabay og lapok sa pamasin nga mapul-an nang mga magbubuhis pagpaningil sa bangis nilang krimen ug modawat na lang sa pait nga kamatuoran nga way mapili sa mga nangatungdanan.
Di hinuon inutil ang ligdong nga mga opisyal nga igo lang giduhig sa kontrobersiya. Angay silang mohatag og kuwentada giunsa paggasto hangtod sa kataposang usa ka dako ang ilang pork barrel (P200 milyones matag tuig sa senador ug P70 milyones matag tuig sa kongresista). Di hinuon makalingkawas sa pasangil pinaagi sa pagarpar lang. Angayng dasonan ang ilang pangangkon sa mga dokumento sa Department of Budget and Management ug Commission on Audit nga nahibalik sa katawhan ang ilang buhis.