Nukos-nukos ni Binay
Nagkalawom ang gahong nga nahimutangan ni Bise Presidente Jejomar Binay. Human nangugat nga way anomaliya ang pagtukod sa P3.2 bilyones nga annex building sa Makati City Hall dihang niulbo ang kontrobersiya pila ka semana ang nilabay, karon niangkon nang iyang kampo nga kon may kahiwian nga nahitabo way labot ang mga sakop sa Pamilyang Binay.
Gitulisok ni Cavite Governor Junvic Remulla, bagong tigpamaba ni Binay, ang tulo ka dagkong opisyal sa Makati nga maoy nagpasiugda sa pagmaniobra sa mga subasta: Silang kanhi bise mayor Ernesto Mercado; Mario Hechanova, kanhi vice chairman sa bids and awards committee; ug anhing City Engineer Nelson Morales.
Mahimong makalingkawas ang mga Binay sa nitumaw nga mga ebidensiya nga posibleng overpriced ang parking building. Kon ilang kapamatud-an ang mga pasangil batok nilang Mercado ug Hechanova, nga nibarug batok ni Bise Presidente Binay sa nagpadayong imbestigasyon sa Senado, ug ni Morales nga namatay niadtong 2012.
Apan kinahanglang bakwion ni Binay ug sa iyang mga anak nga silang Makati City Mayor Junjun Binay, Senador Nancy Binay ug Kongresista Abigail Binay ang ilang nahaunang pagdupa sa building nga "green" ug "world-class" ug pag-insistir nga way bisan usa ka dako nga nausik sa proyekto, hinunoa nakaginansiya pa gani ang mga magbubuhis og P200 milyones.
*** Kinahanglan sang bakwion ni Binay ang kinaham niyang pangandak sa "zero tolerance" sa pangurakot atol sa pagpulipuli sa mga Binay pagduma sa Makati. Di mapanghimakak ni Binay nga iyang mga suod ug sinaligan silang Mercado ug Hechanova sa wa pa mobalitok batok niya.
Samtang di na masukitsukit si Morales tinuod bang maoy naghatag nilang Hechanova ug ubang mga sakop sa BAC og P200,000 matag buwan aron pagpadaog sa pinalabing mga kontraktor sa mga Binay, kinahanglang ipasabot sa bise presidente nganong gitugotan sa, o nalutsan ang, iyang pamunoan sa mga binuang. Siya pa gani ang namasangil ni Mercado nga nangurakot sa gipatuman nilang mga proyekto.
***
Angay sang mohukom na si Binay atubangon na ba ang mga namasangil niya. Kon padayong magpasalipod sa iyang mga anak ug mga tigpamaba, kapasanginlan siyang nikakak. Apan kon moatubang sa Senado, seguro siyang labhan sa higpit niyang mga kaatbang nga silang Senador Alan Peter Cayetano ug Senador Antonio Trillanes IV. Sa way paghisgot ni Senador Koko Pimentel, kansang liderato sa PDPLaban gilawgaw ni Binay pila ka tuig ang nilabay.
Di mahimong magsalig lang si Binay sa gitawag ni Cayetano nga "Binay Broadcasting Corporation" o sinuholan niyang mga sakop sa media. Kinahanglang tagsa- tagsaon na pagtubag ang nagbuntaog nga mga detalye sa mga pasangil sa pangurakot batok niya, sa way pagpa-goryo-goryo nga gihasi siya sa mga politiko wa ra sa kumingking sa iyang gahom ug popularidad.