Nihungaw nga mga protesta
Dihang nisulbong ang mga pasangil sa pangurakot batok ni Bise Presidente Jejomar Binay, labihang hiloma sa Bagong Alyansang Makabayan ug ubang militanteng mga pundok. Dihang nagdumili si Binay pagtubag sa mga pasangil batok niya, tak- om ang BAYAN ug mga alyado sa pakigbisog batok sa pangabuso. Dihang gipili ni Binay ang pangampanya sa Sugbo kay sa pag- atubang sa imbestigasyon sa Senado, ang BAYAN nagpadayon sa pagpa- goryogoryo.
Apan sa matag kapandol ni Presidente Noynoy Aquino, gikan sa hostage crisis sa Luneta ngadto sa trahedya sa Mamasapano, labihang abtika sa BAYAN ug ubang militanteng mga pundok sa pag- awhag sa iyang resignasyon ug, sa dihang nagdumili pagsanong si Aquino, nangu sa paglusad og people power batok ni Aquino.
*** Nagmatngon hinuon ang BAYAN nga di kadudahan nga tua kapusta ni Binay. Maong gidalidali pagpaikog sa ilang demanda nga di sila ganahan nga si Binay ang mobanos sa Malakanyang. Nisugyot sila nga usa ka transitory government ang kasamtangan nga moduma sa nasud samtang usbon ang sistema sa gobyerno aron mahimo na gyod nga tinuod nga representante sa kinabag-an sa katawhan.
Labihan kakusganon sa ilang demanda, labihan kalig- on sa ilang argumento ug labihan kaligdong sa kampanya, nga maoy labing uwahi sa taas na uyamot nga kutay sa mga pakigbisog alang sa giisip nga labing makiangayon nga kausaban, nga niabot gyod og 100 ang nanguyog sa ilang protesta.
*** Ambot nakamatngon bang BAYAN nga ang ilang demanda nitakdo sa baruganan sa National Transformation Council, nga gipangulohan sa mga alyado ni kanhi presidente Gloria Arroyo. Nitanyag sang NTC nga sila ang mobanos pagduma sa nasud kon mo- resign o mapalagpot na ang tanang opisyal sa gobyerno.
Nabalaka hinuon ko nga l ahi ang mga personalidad nga ganahan sa BAYAN ug NTC nga moduma sa kasamtangan nga gobyerno. Kana kon ila gyod ning gihinuktokan. Kay hangtod karon maglisod sila paghingan og bisan usa lang ka ngan sa itugpo nilang mopuli nilang Aquino, Binay ug ubang mga opisyal nga ganahan nilang pulihan.
*** Nagpabiling mingaw ang reaksiyon sa katawhan bisan pila na ka adlaw human sa pangampanya sa BAYAN, NTC ug ubang kahugpongan pagpalagpot ni Aquino sa katungdanan. Mas daghan pang polis kay sa mga nagprotesta sa EDSA ug ubang bahin sa nasud. Angay tingaling sublion sa BAYAN ug NTC ang pangangkon nga sila ang nagda sa tingog sa katawhan.
Sa pikas nga bahin, di angayng moinsistir si Aquino sa kagahi sa iyang ulo ug kataas sa iyang garbo. Hinaot nga tumanon ang saad nga motug- an na sa tinuod ug moangkon na og hingpit nga responsibilidad i nigkahuman sa opisyal nga imbestigasyon sa Board of Inquiry sa Philippine National Police, nga gitakdang mopagawas na sa resulta sunod semana.