Hain na man ang kaso?

Kapin sa duha ka semana na human nasakpi sa mga inspektor sa Department of Energy sa Central Visayas ang Auto- LPG station sa usa sa labing dakong kompaniya sa taxi sa Sugbo nga way Certificate of Non- Coverage, nga maoy magtugot sa taxi operators pagtubil sa ilang kaugalingong taxi units.

Hangtod karon wa pay bisan unsang kaso nga napasaka batok sa King Spider Taxi Company kansang Auto- LPG station sa ilang grahe sa Happy Valley, Cebu City naaktohan sa mga inspektor sa DOE sa wa pay Semana Santa nga way permiso gikan sa ilang buhatan. Wa na ma- renew ang kataposang CNC nga giluwatan niadto pang 2009.

*** Sa iyang bahin, si Energy Secretary Jericho Petilla nitataw nga seryuso ang kalapasan sa pagoperate sa taxi operators sa ilang Auto- LPG station nga way CNC. Gipasabot ni Petilla atol sa Arangkada sa DYAB Abante Pa, Bisaya! nga gikinahanglan ang tinuig nga paglab- as sa CNC aron masusi ang kaluwas sa higanteng mga tangke sa Auto- LPG di lang ngadto sa mga kawani sa taxi companies kon dili ngadto sab sa mga molupyo sa palibot sa mga grahe.

Hinaot nga ang pagtingog ni Petilla makaapura sa mga abogado sa DOE nga gikatahong nagtuon pa hangtod karon unsay sunod nga lakang nga ilang irekomendar nga angayng himuon ni DOE 7 Regional Director Antonio Labios.

*** Niangkon si Petilla nga kuwang ang mga inspektor sa DOE maong nagpakitabang sila sa local government units sa pagsusi sa kaluwas sa Auto- LPG stations. Nauyonan nila sa mga mayor nga pangitaan og CNC ang t axi operators nga may Auto- LPG stations sa di pa i- renew ang ilang business permit matag tuig.

Nalutsan bang Cebu City Hall sa operator sa Spider nga si Chiquito Obeso, kinsa mao say tag- iya sa Airland Taxi Corporation ug Scorpion Taxi Corporation? O wa say business permit ang iyang Auto- LPG stations? Nahibawo ba sang Bureau of Internal Revenue nga gawas sa gatosan niya ka taxi, nag- operate sab si Obeso og Auto- LPG stations?

*** Gipasidan- an hinuon mi sa nangreklamo nga taxi drivers sa di pagpadako sa paglaom nga kapaninglan si Obeso ning posibleng kalapasan nga nakit- an sa mga inspektor sa DOE. Hagbay ra silang nangreklamo apan gibungul- bungolan lang sa DOE ug LGUs. Matod sa mga drayber niburot pag- ayo ang negosyo ni Obeso tungod sa lig- on niyang koneksiyon sa dagkong mga opisyal sa gobyerno.

Nipasangil ang mga drayber nga gamhanang mga politiko ang mga bisita ni Obeso sa makabuhong niyang Christmas parties. Gani giila nila nga dakong opisyal sa gobyerno ang kinakusgang abogado ni Obeso. Manghinaot mi nga way sukaranan ang ilang kabalaka nga tungod sa iyang mga padrino di na madutlan si Obeso sa atong mga balaod.