Kabuot ni Konsehal Nida
Karong natak-opan na’ng kontrobersiya sa nangawagtang nga 79 ka punoan sa kahoy sa Serging Osmeña Boulevard sa North Reclamation Area sa Dakbayan sa Sugbo, mahimo nang moginhawa og luag ang tanang hingtungdan ug moangkon nga way tinuod nga kontrabida: Ang Department of Public Works and Highways (DPWH) igo lang niapura sa pribadong kontraktor pagsemento sa dan sa gitakdang panahon; Ang WT Construction igo lang nagdali paghawan sa dan aron makabuylo pagsemento sa duha ug tunga ka kilometro nga dan aron nga makobra na’ng kinatibuk-an nga bayad nga P289.5 milyones nga bayad sa DPWH; ug Ang Department of Environment and Natural Resources (DENR) igo lang nituman sa iyang tahas pagpangita sa nangawagtang nga mga kahoy ug pagpanalipod sa nahibiling mga kahoy.
Apan bisan nakatigom nang DPWH ug WT og 7,900 ka lawngon sa kahoy ug padayong nigasto ug nipahigayon sa earth balling sa nahibiling mga kahoy, di ikalimod nga may 79 ka punoan sa kahoy nga giluba kapin na sa tuig ang nilabay. Mahimong gi-backhoe, gibugha, gisugnod ug hagbay rang naabo. Angay hinuong patubagon ang mga mamumuno ug mga kawatan.
Gibasura na sa Cebu City Prosecutor's Office ang kaso batok sa DPWH ug WT, nga maoy gipasanginlang nanghilabot sa mga kahoy, apan nipasaka og motion for reconsideration ang DENR. Nga angay lang. Di angay’ng tablahon ug kalimtan na lang ang tanan.
Ang maayong balita mao nga ang nag-ung-ong nga kaso di na makahigot sa proyekto, di na makabihag sa nahibiling mga kahoy ug labaw sa tanan di na makapahimutang sa peligro sa mga motorista ug mga pasahero.
Ug ang angay’ng pasidunggan mao si Cebu City Councilor Nida Cabrera. Siya ang labing unang nipahibawo sa mga Sugbuanon sa pagkawagtang sa mga kahoy ug siya say nagda og kabuot nga sa kataposan maoy nilugtab sa kapin na sa tuig nga gapos sa patas-anay og garbo sa DENR, DPWH, WT ug ubang hingtungdan sa kontrobersiya.
Gikinahanglan ang kabuot ni Cabrera aron paghusay sa ubang binata nga panagsungi sa DENR, DPWH ug pribadong mga kontraktor sa uban pang road projects: Pagpalapad sa M. Velez, Cebu City nga gipatuman sa JJ and J Construction nga nakapugos sa mga motorista pag-ikis-ikis og dagan kay gipabilin ang mga kahoy sa tungatunga sa dan; Nahimong mas lapad ang sidewalk kay sa dan sa pipila ka bahin sa M. L. Quezon Avenue sa Lapu-Lapu City tungod sa pagsalikway sa DENR sa aplikasyon pagpamutol sa mga kahoy ug sa pagdumili sa DPWH pagbalhin sa mga kahoy ngadto sa mas tukmang luna; ug Pagpalapad sa nasudnong highway sa Naga City sa habagatang Sugbo nga nisangpot sa pagpabilin sa higanteng mga punoan sa Akasya sa tungatunga sa sementadong dan.