Tinagoan sa MCWD
Hinaut nga atol sa labing unang water summit sa Dakbayan sa Sugbo karong adlawa, mokumpisal na’ng kadagkoan sa Metro Cebu Water District sa tinuod nga kahimtang sa suplay sa tubig. Kay hangtod karon dako lang gihapon kaayo ang kang-a sa mga pasalig sa ilang kadagkoan ug sa kaapiki sa aktuwal nga kahimtang sa mga konsumidor sa tubig.
Kun di mangisog silang Cebu City Mayor Mike Rama ug ubang lokal nga mga opisyal sa Metro Cebu, nabalaka ko nga magpadayon ang MCWD sa pagpasundayag sa sayop nga hulagway. Dihang gipangutana ang usa sa mga tagduma nganong nagkadaghan ang mga barangay nga wa nay agas, igo lang nipasalig nga mahibalik ang normal nga suplay kun moabot na’ng tinguwan.
*** Kun basahon ang opisyal nga mga pahibawo sa MCWD sa social media, wa gyo’y bisan gamay na lang timaan nga naproblema na’ng ilang suplay tungod sa El Niño. Pananglitan nagpahibawo silang mapawong o hinay ang agas sa tubig karong Sabado, Mayo 23, sa Ermita, El Filibusterismo, Kawit Street, Escaño Street, Noli Me Tangere, M. Escaño Street, Quezon Boulevard., Progresso Street, MC Briones Street, Carbon Area ug Magallanes, Cebu City.
Apan gibasol ang pag-ilis og metro sa tubig duol sa Visayan Electric Company sa Ermita. Nipasidaan nga mapawong ang tubig sa kabahin sa Liloan ug Compostela karong adlawa apan tungod sa pagtrabaho sa ilang mga linya.
*** Wa silay bisan unsang pahibawo unsa’ng mga barangay o lungsod o dakbayan nga mawad-an og tubig tungod sa kakuwang sa suplay. Nga hagbay rang nahiagoman sa pipila ka mga barangay sa Cebu City ug Lapu-Lapu City.
Ang opisyal nga katin-awan sa MCWD mao nga igo lang nilang gipatuman ang "water pressure management." Unya na kuno sila moangkon nga may problema sa suplay sa tubig kun wa na gyud silay tubig nga mahatod ngadto sa kabalayan. Sa ato pa, unya na sila motug-an sa tinuod kun uwahi na’ng tanan.
***
Di kinahanglan nga molantaw og layo ang MCWD. Angay lang nilang kopyahon ang gihimo sa VECO matag higayon nga magkuwang ang suplay sa kuryente. Pasidan-ang daan ang maapektahan nga mga barangay ug pila ka oras ang rotating brownouts.
Nganong bukid man sa buot sa MCWD ang pagangkon nga nag-rasyon na og tubig? Di sila maoy sadan sa huwaw ug kanihit sa suplay. Dako og tabang kun ipahibawong daan unsa’ng mga barangay nga maigo, unsang orasa mapawong ug kanus-a mobalik og agas. Dakong kadaot kun padayong makugang ang mga konsumidor nga wa na diay tubig nga ipangluto ug ikaligo, nga magtukaw tibuok gabii ug kadlawon pagpaabot sa agas ug kun mapakyas pagmata sa pagagas mosangpot na hinuon sa pag-awas ug pagkausik sa nihit nga tubig.