Pagpatuman sa 4Ps
Samtang nanubag sa among mga pangutana sa Arangkada sa DYAB Abante Pa, Bisaya!, nakadawat og text message si Ruben Boybanting, Regional Program Manager sa Listahanan sa Department of Social Welfare and Development (DSWD), nga napaakan og iro ang usa sa ilang enumerators sa Liloan, amihanang Sugbo.
Kabos ang tag-iya sa iro busa di makatabang sa biktima. Mga opisyal sa barangay moabaga ra og usa ka injection batok sa rabies. Usa lang ni sa inadlawng kakulian sa nagpadayon nga ikaduhang hugna paglista sa labing kabos nga mga pamilya sa Sugbo, Bohol, Siquijor ug Negros Oriental nga makapahimus sa Pantawid Pamilyang Pilipino Program (4Ps) ug ubang programa.
*** Mas grabe ang nahiagoman sa ilang enumerator sa barangay sa Bohol nga wa ilha ni Boybanting. Nasuko ang nakainom nga konsehal nganong nanglista siya sa mga molupyo og adlawng Dominggo. Nipasabot ang enumerator nga di niya maatlan ang mga tagbalay sa ubang mga adlaw sa semana.
Nakagunit og pala ang konsehal ug gihan-an gyud og bunal ang enumerator. Maayo na lang nga napugngan sa mga silingan, may nakatawag dayon og mga polis ug naluwas ang biktima. Matod ni Boybanting gisuspenso dayon nila ang pagpanlista sa barangay. Gipalabay ang pila ka adlaw una gipadayon ang pagpanlista dihang hingpit nang nahupay ang tensiyon.
*** Apan ang labing dakong hulga sa kaligdong sa Listahanan mao ang pagpamakak sa pipila ka molupyo nga mamugos nga makaapil sila sa 4Ps. Mabantang sa enumerators nga gipangandaman ang ilang pag-abot: Gipanagoan ang appliances, nangilad nga nag-abang ra sa bay ug nga hinuwaman ra’ng mga sakyanan sa nataran. May mga politiko sang moinsistir nga unahon ang gilista nilang mga dumadapig.
Natino hinuon sa enumerators ang kamatuoran pinaagi sa pakighinabi sa mga silingan. Bisan sa tanang pagbantay may mga higayon gihapong malutsan sila. Maong gidasig ang mga nakabantay nga may beneficiaries sa 4Ps nga mas hamugaway kay sa ubang tabanganan sa pag-text sa ilang hotline nga 09189122813.
Kinaham sa daghan uyamot nga kontrobersiya ang 4Ps tungod sa kadako sa gahin (P65 bilyones) ug sa kadaghan sa beneficiaries (28 milyones). Dali ra’ng pagpasangil nga gibolsa ra’ng kuwarta ug gamiton sa pamolitika. Apan niingon si Phoebe Jen Indino, tigpamaba sa 4Ps sa rehiyon, nga makahupay sa kakapoy pagpatuman sa programa ang tam-is nga pahiyom sa mga pamilya nga nahaw-as sa katimawa.
Ganahan kong motan-aw sa pagpasidungog sa labing sulundong mga pamilya sa 4Ps sa tibuok rehiyon karong Huwebes, Agosto 13, sa SM City sa Dakbayan sa Sugbo. Matod ni Kerwin Macopia, tigpamaba sa DSWD-7, ang mananaog morepresentar sa Central Visayas sa national search. Mga mananaog sa unang duha ka tuig sa Huwarang Pantawid Pamilya pulos gikan sa Bohol, taga Sagbayan ug Carmen.