Piyesta sa pangilad

Mahimong magsul-ob sa ilang campaign shirts, manghakot sa ilang mga dumadapig, magsaba-saba og banda, manglamano sa tanang botante nga malabyan sa kadalanan ug mopasiugda sa bisan unsang matang sa pangampanya ang mga mosumiter sa ilang certificates of candidacy sa mga buhatan sa Commission on Elections karong semanaha.

Nipasabot si Cebu City North Election Officer Marchel Sarno nga, bisan nadawat na ang CoCs sa mga politiko, di pa makapahamtang ang Comelec sa mga lagda sa kampanya hangtod nga magsugod na ang opisyal nga campaign period unya sa Pebrero 9 alang sa nasudnong mga kandidato ug sa Marso 25 alang sa lokal nga mga kandidato.

Sa ato pa, bisan nakasumiter na sa ilang CoCs, makapatuyang gihapon ang mamintaha nga mga managan sa piniliay pagbandera sa ilang campaign materials nga way tulubagon sa COMELEC bisan molapas pa sa limitasyon sa gidak-on sa posters ug streamers ug mga dapit nga kabutangan.

Ang mga managan nga nagtumpi ang puntil sa kampanya ug busa makaabot sa dako uyamot nga bayranan sa mga estasyon sa radyo ug telebisyon ug sa tabloids ug pamantalaan makapatuyang pagsibya sa ilang political advertisements pagdayeg sa ilang kaugalingon ug pagdaot sa ilang mga kaatbang. Sa sulti pang Cebu Provincial Election Supervisor Lionel Marco Castillano way premature campaigning hangtod magsugod nang campaign period.

Mao ni katin-awan sa COMELEC sa kabalaka nga gipadayag sa pipila ka politiko nga mahimong maigo sila sa technicality kon di magbantay sa ilang lihok atol sa pagsumiter sa ilang CoCs. Nabalaka sila nga kon magpatuyang ang ilang mga dumadapig pagsul-ob sa ilang campaign shirts ug pagpakayab sa ilang campaign materials mahimong ma-disqualify ang tanang piliunon sa ilang partido.

Maong nakahunahuna na lang gani nga inay sa naandan nga magkuyog, magtagsa-tagsa na lang sila paghatag sa ilang CoCs ngadto sa buhatan ni Sarno nga maoy gitahasan sa nasudnong buhatan sa COMELEC pagdawat sa CoCs sa duha ka distrito sa Dakbayan sa Sugbo.

Apan tungod sa katin-awan ni Sarno mobalik og kiat ang mga politiko. Masaksihan na sab sa mga botante ang usa sa labing dakong eskandalo sa atong panahon. Mahimo sa mga politiko ang tanang gidili nga pangampanya. Nga inutil sa pagbadlong ang ahensiya nga gitahasan pagpatuman sa mga lagda sa makiangayong piniliay.

Ug nga way makapanalipod sa mga botante sa way kinutobang pamakak ug pangilad. Hapit tanang politiko niisip sa Santos nga Misa nga panginahanglan sa di mag-piyesta og lapas sa mga lagda.

Bugtong limitasyon maong lahutay sa pundo sa kampanya. Ug kanus-a madutli ang tig-a nilang tanlag sa tulisok sa kauwaw. Ang masulub-ong kamatuoran mao nga samtang abunda sa papating labihang nihita sa mga politiko sa mga mithi sa kaligdong ug katarung.