Kainit sa politika

Karon kay nagsugod na man g’yud ang pagsang-at sa mga certificates of candidacy sa mga mokandidato sa eleksyon sunod tuig, angay na usab kita nga mosugod sa pagtimbang-timbang kun kinsa kanila ang atong botohan.

Dili ang kasikat sa usa ka kandidato maoy angay’ng basehan kun kinsa ang atong botohan, kon dili, ang atong pagpili ibase nato kun kinsa kadto’ng sinsero g’yud nga moserbisyo ug labaw sa tanan - dili corrupt.

Ang uban nag-inabogado pinaagi sa pag-ingon nga adunay pipila nga mokandidato pagka presidente nga nagatubang og pasangil sa kurapsyon apan wala pa man kuno mapamatud-i nga sad-an.

Dili g’yud tukma nga ang atong nasud itugyan nato sa tawo nga nag-atubang og bati kaayo nga dungog tungod sa giingong pagkalambigit niini sa kurapsyon.

Mas nindot g’yud nga adunay ipahigayon nga debate alang sa mga kandidato pagka presidente. Kini aron nga mahibaw-an kun unsa ang ilang mga plano aron molambo ang atong nasud.

Hinuon, wala’y kulba kun himoon ang debate kay sila si Vice President Jejomar Binay, Senador Grace Poe, kanhi DILG Secretary Mar Roxas, pulos mga takus nga makiglantugi.

Ambot lang kun mosukol ba kaha si Binay og debate, ilabi na kun ang isyu mao ang isyu sa graft and corruption kay kini man maoy pasangil batok kaniya.

Kun tugotan hinuon sila og kahigayonan nga mopasigarbo sa nahimo nila nga kalamposan sa panerbisyo sa kagamhanan, mura’g si Roxas ang makabentaha.

Wala malilong sa katawhan nga si Roxas maoy responsable sa pagsulod sa mga call centers dinhi sa nasud diha nga DTI secretary pa siya. Si Roxas usab ang nakapabarato sa mga maintenance drugs pinaagi sa giduso niya nga balaod – ang Cheaper Medicines Act.

Nag-atubang og problema si Gobernador Junjun Davide kay ang mga supporters sa pamilya nga Ouano diha sa Mandaue hayan dili mosuporta kaniya.

Tungod kay wala man g’yud iduso ni Davide didto sa kadagkoan sa Partido Liberal aron nga si Konsehal Lolypop Ouano-Dizon maoy kandidato sa LP diha sa Mandaue, ang kaatbang ni Davide maoy makabentaha diha kay ang mga dumadapig sa mga Ouano adto man molaban kang Winston Garcia nga maoy kandidato sa One Cebu pagka gobernador.

Ikasangka ni Lolypop sa pagka mayor mao si Kongresista Luigi Quisumbing nga maoy gipili nga standard bearer sa LP sa pagka mayor. Basta kay alegre g’yud kaayo ang politika diha sa Mandaue sa pagka mayor.

Dinhi sa dakbayan sa Sugbo, sigurado g’yud kaayo nga init ang eleksyon sa pagka mayor tali kanila ni kanhi mayor Tomas R. Osmeña ug incumbent Mayor Michael Rama.

Ang nindot g’yud unta mao nga kampanya lang sa mga botante ug wala g’yud unta’y mohimo og pagpanikas. Unya, kinahanglan g’yud nga ang mga sakyanan sa kagamhanan, dili gamiton sa kampanya.

Kining akong awhag gitumong nako ngadto sa mga opisyal sa dakbayan sa Sugbo, apil ni Mayor Rama, Vice Mayor Edgar Labella ug sa mga konsehal, sakop man sa Team Rama o BOPK, nga inigkagabii panahon sa kampanya, mogamit sila og pribado nga sakyanan.

Dili maayo nga gamiton sa kampanya, pinaagi sa pagbalhin-balhin sa lainlaing barangay, ang mga sakyanan sa kagamhanan. Mga butang nga iya sa kagamhanan dili usab angay’ng gamiton sa politikanhong katuyoan.

Unya, dili gayud unta angay nga magpakatap na og mga propaganda materials samtang wala pa magsugod ang kampanya. Apan ambot kun mapugngan pa kini.

Tingali ang katawhan na maoy pahukmon nga kadtong mga kandidato nga manikas, dili angay nga botohan. Mas nindot g’yud unta kun ang mga dumadapig mokalma lang, dili kay magbaton og subra sa kaisog paglaban sa ilang mga kandidato.

Ang uban diha, puwerte makahimo og pangatake. Unya, kadtong mga tawo nga mopadayag lang sa matuod apan wala masubay sa ilang buot ipalutaw nga isyu, pasanginlan dayon nila nga anaa sa payroll sa ilang kaatbang.