Nukos-nukos ni Duterte
Sa usa ka bahin, angayng malipay si Davao City Mayor Rodrigo Duterte sa wa pagtuo sa iyang mga dumadapig sa labing uwahing pahibawo nga di modagan pagka presidente. Kay nagmatuod ni sa kainit, kadasig ug kahingpit sa ilang pagpaluyo sa kampanya pagpahimutang niya sa labing taas nga katungdanan sa nasud.
Sa pikas nga bahin, angay sang maguol. Kay nagmatuod nga wa na sila motuo niya. Bisan kapila balikbalika nga di siya modagan. Kay kapila man sab balikbalika nga may kahigayonan pang modagan siya. Alang sa lider nga nabantog sa kalig-on og baruganan, daotang balita alang ni Duterte nga ang iyang mga dumadapig di nang kahibawo kanus-a siya namakak o nagsulti sa tinuod.
*** Gipasabot ni Duterte nga ang pagsupak sa mga sakop sa iyang pamilya, labi na sa iyang anak nga si kanhi Mayor Sara Duterte, nga maoy nakapugong niya sa pagdagan. Apan may mga pangagpas sab nga ang pagkalansang sa iyang rating sa nasudnong surveys, nga nisangpot sa mas bugnaw nga reaksiyon sa higanteng mga negosyante sa iyang posibleng kandidatura, maoy nakapawong sa iyang interes.
Bisan unsa pa ang tinuod nga rason, napamatudan ni Duterte nga lahi siya sa ubang mga politiko. Kon kasarangan pa nga lider hagbay ra untang nasugba sa way kinutoban nga mga ulog-ulog sa mga naglibot niya sa nag-ung-ong na niyang kadaogan.
***
Si Duterte ang nahimong simbolo sa sibaw nga awhag sa dakong kausaban pinaagi sa pagbungkag sa monopoliya sa Metro Manila sa labing dakong bahin sa nasudnong gahom ug katigayonan ug paghatag og mas makiangayon nga pahat ngadto sa mga lalawigan.
Nga mas makahuloganon kay sa gibarugan sa iyang mga kaatbang: Si Senador Grace Poe nagpahimus sa lapad ug emosyonal nga suporta tungod sa iyang kalunsay ug pagka anak ni anhing Fernando Poe Jr.; Si kanhi Interior Secretary Mar Roxas maoy sumusunod sa kalamposan sa pamunoan ni Presidente Noynoy Aquino; ug si Bise Presidente Jejomar Binay nagsandig sa nasuwayan nang makinarya ug kasuod sa masa.
***
Apan si Duterte niangkon nga di pa andam ang kinabag-an sa dagkong kausaban nga gusto niyang ipatuman, sama sa pag-usab sa sistema sa gobyerno. Ang popularidad sa iyang mga saad pagbungkag sa Kongreso ug pagbitay sa banggiitang mga kriminal nagtimaan sa kauhaw sa way pili ug kukahadlok nga pagpatuman sa balaod.
Pabilin hinuong nag-una si Poe, nisulbong si Roxas ug bisan nitidlom labaw gihapon niya si Binay. Kabanggiitan sa politika nagpasidaan niya nga di makatuyhad ang nasudnong kampanya kon way kuwarta. Nga di maangkon kon pabiling mangiwit. Maong nangagpas nga ang nasud wa magkinahanglan niya. Sa tago, nanghinaot hinuon nga sa di pang alas-5 sa hapon sa Oktubre 16 may mga panghitabong makapausab na sab sa iyang hunahuna.