Nag-abot si Mike ug Tommy
Samtang nakighinabi kong kanhi Cebu City Mayor Tommy Osmeña mahitungod sa padayong pagsupak sa mga konsehal sa Bando Osmeña Pundok Kauswagan (BOPK) sa Supplemental Budget No. 1, nibagting ang akong telepono. Si Mayor Mike Rama ang nanawag. Kay di man kong katubag, nangita kong June Perez, among desk sa DYAB Radyo Patrol Balita, aron maoy makighinabi ni Rama.
Wa na bang kaagwanta si Rama nga naminaw sa mga gipanulti ni Osmeña? Ug nanawag aron nga motubag? Nananghid kong Osmeña mahimo bang magsulti silang Rama? Dihang niuyon si Osmeña, nagdalidali ko og commercial break. Matuman na bang dugay nang gipangayo sa mga tigpaminaw nga mag-abot silang Rama ug Osmeña?
* * * Para sa mga di tigpaminaw sa Arangkada sa DYAB Abante Pa, Bisaya!, pahibaw-on mo namo nga sud na sa pila ka higayon nga nagpulipuli silang Rama ug Osmeña pagduaw sa among studio o pagpanawag sa telepono. Maong niawhag ang mga tigpaminaw nga abuton namo silang duha sa usa lang ka higayon o sa sama gyong dapit.
Wa pa kong kakita og higayon sa pagdungan og imbitar nilang Rama ug Osmeña. Apan gi-cover namo ang nangaging mga tigom nga gitakda unta silang magabot, sama sa buwag nga mga forum sa University of San Carlos ug Kapisanan ng mga Brodkaster ng Pilipinas, ug nabawo sa matag higayon.
* * * Samtang nagtokar ang commercials, nibawos kog tawag ni Rama. Busy ang iyang linya. Kay namahaw man si June, namalihog ko sa among technician nga si Nilo Borenaga. Nitubag si Rama sa landline nga gitawgan ni Nilo. Igo gyong nahuman ang commercials, nisenyas si Nilo nga niuyon na si Rama nga amo siyang ibutang sa kahanginan.
Tungod sa pagtuo nga naminaw siya sa Arangkada ug nga gustong motubag ni Osmeña, giawhag dayon nako si Rama pagtubag sa pag-insistir ni Osmeña nga igo lang nagtuman ang mga konsehal sa ilang trabaho sa ilang pagkutikuti sa P3 bilyones nga supplemental budget.
* * * Subling gipasabot ni Rama nga matuman sa City Council ang ilang trabaho kon aprobahan o ibasura ang budget, di yak-an lang. Gibasol siyang Osmeña nga maoy responsable sa problema kay niusab sa ordinansa sa pagbaligya sa mga luna sa SRP pinaagi lang sa resolusyon.
Hangtod nga nibalibad si Rama nga patubagon si Osmeña sa iyang pamahayag. Nitubag hinuon sa pagtuki ni Osmeña sa P550 milyones nga mga proyekto nga wa mapatuman ug sa P99 milyones nga unliquidated cash advances. Dayon gipasanginlan ko ni Rama nga wa motarung pagpahibawo niya nga diha diay si Osmeña sa studio. Ako siyang gipasabot nga wa koy kahigayonan pakigsulti niya samtang nakighinabi kong Osmeña. Apan siyay nanawag ug niuyon nga magkasulti sila. Hinaot masundang ilang panagabot nga mas klaro nang sabot.