Kanihit sa tiket
Dihang gipahibawo mi sa producers sa It's Showtime ug ASAP 20 nga ipahigayon sa Sugbo ang duha ka live shows, nisugyot mi nila sa dakong hawan sa South Road Properties (SRP). Nga gihangop nila human gipahinumdoman sa naglawud-lawod nga katawhan nga nisaksi sa ASAP Rocks Cebu! sa mas hawan pang SRP niadtong 2011.
Nanganhi dayon sa Sugbo ang producers ug marshalls pagsugod sa pagpangandam sa dagkong kalihokan. Gitahasan ni Cebu City Mayor Mike Rama si Barangay Kapitan Joel Garganera pakiglambigit nila. Gawas sa SRP, gisusi nilang Cebu City Sports Center ug New Cebu Coliseum. Gipasabot silang Garganera nga ang SRP maoy labing lisod ug ang coliseum maoy labing sayon sa crowd control.
Tungod sa kalitkalit nga pagbunok sa uwan sa Sugbo ug sa pasidaan sa umaabot nga mga bagyo bisan taliwa sa El Niño, nabalaka ang kadagkoan sa ABSCBN nga mahasol ug mameligro ang kahimsog sa mga manan-aw. Nihukom sila nga itingob ang mga paningkamot pagpangita og indoor venues.
Labing dako nga indoor venue ang New Cebu Coliseum, nga gibanabanang kasudlan og hangtod 10,000 ka tawo. Apan labihan kapuno sa nakalendaryo nang daan nga politikanhong mga kombensiyon, Cebu Schools Athletic Foundation Inc. Finals ug gradwasyon sa University of Cebu, nga di kabalibaran kay maoy tag-iya sa coliseum. Nobiyembre pa ang labing sayo nga bakante.
Maong sunod nga gidangpan ang Hoops Dome sa Gun-ob, Lapu-Lapu City. Apan may kalihokan sa kabataan nang gitakda si Mayor Paz Radaza sa Oktubre 17. Gihangyo ni Ferdinand Manus sa dyAB Radyo Patrol si Radaza sa pagsusi mahimo bang mauswag ang iyang kalihokan.
Human sa pila ka adlaw, nisugot si Radaza nga iuswag ang iyang kalihokan sa kabataan ngadto sa Oktubre 24. Nakabuylo dayon ang pangandam nga naglakip sa paghakot sa tanang ekipo ug pagpangita og pinuy-anan sa tanang artista ug crew. May nahibilin pa hinuong suliran: Gamay rang kapasidad sa Hoops Dome.
Human sa pagpahimutang sa dakong stage ug tanang ekipo, 4,000 ray makalingkod. Nahukman nga 3,000 ray pasudlon aron kalikayan ang kahuot ug kaguliyang. Nagprinta og 6,000 ka tickets nga tungaon sa Showtime ug ASAP ug tungaon sa duha ka venues sa pag-apud-apod.
Kadlawon pa gani, kapin na sa 6,000 ang nagtapok sa Hoops Dome ug ABS-CBN Complex nga nisangpot sa kahuot sa trapiko sa nasudnong highway atubangan sa among sibyaanan. Maong gipanghatag nang tickets sa wa pang gitakdang oras. Mangayo mi og pasaylo sa mas daghang nabalibaran. Ambot makaiban ba sa ilang kahimangod nga kaming taga ABS-CBN tagsa ray tiket ug busa nagkapuliki sab og balibad, kay gikahiubsan ug naawayan gyud gani, sa namarayeg namong mga sakop sa pamilya ug mga higala.