Epektong Duterte sa 2016
Human sa kakugang, pagduda. Di kabasol si Davao City Mayor Rodrigo Duterte kon mao ni pasiunang mga reaksiyon sa mga botante sa iyang pahibawo, human sa pila ka buwan nga mga pasumbingay ug atras-abante nga mga deklarasyon, nga sa kataposan nakahukom na siya sa pagdagan pagka-presidente sa piniliay sa Mayo 9, 2016.
Ang sibaw nga pagsaulog sa iyang mga dumadapig sa Sugbo ug ubang bahin sa nasud mahimong makaiban kon di man makapapas sa pagpanluod sa wa niya pagapas sa deadline pagpasaka sa certificates of candidacy niadtong Oktubre 16. Mahibaw-an sa mosunod nga mga adlaw kon ang kadasig sa pag-awhag niya pagdagan malabwan ba o bisan maambasan lang sa paghangop sa aktuwal niyang pagdagan. Napapas na bang mga babag sa iyang pagdagan nga gikumpisal ni Duterte sa makadaghang higayon? Duna na ba siyay kuwarta? Duna na bay makinarya paglusad sa nasudnong kampanya? Nawa na bang mga sakit sa hinog niyang pangedaron? Ug nakumbinser na bang dunay mahimong makahuloganong kausaban sud sa unom ka tuig nga termino?
Mahimong nakapadasig ni Duterte pagdagan mao ang talagsaong kampanya sa unang termino ni US President Barack Obama. Gipilde niyang mas gamhanang makinarya sa politika nilang Hillary Clinton ug sa Republican Party pinaagi sa pagpangayo og amot sa kasarangang mga botante. Apan mas nakabuylo si Obama pagpalihok sa masa paggasto sa iyang kampanya.
Angay bang mabalaka si Senador Grace Poe sa kandidatura ni Duterte? Samang magpangikog ang uban niyang kaatbang pagkuwestiyon sa iyang citizenship, si Duterte nitumbok sa mga pagduda tinuod bang Pilipino si Poe nga maoy kataposang nakapakumbinser niya sa pagdagan.
Ang subli-subli unyang pasidaan ni Duterte sa dakong kakuyaw nga makapili ang katawhan og di Pilipino nga presidente di ba kaha makapabugnaw sa mga botante sa pagpamasin? Mao nay labing dakong kahadlok sa kampo ni Poe. Kay lahi sa desisyon sa COMELEC ug bisan sa Korte Suprema nga mahimo pang ma-apelar, ang hukom sa katawhan lisod nang balihon.
Kon tunok sa kampanya ni Poe ang kandidatura ni Duterte, unsa may epekto ini sa ubang nanagan? Klarong maigo ang kandidatura ni Senador Miriam Defensor Santiago, nga wa pang kaugpo hangtod karon kay giisip rang alternatibo kon di modagan si Duterte.
Maibanan ang boto ni Bise Presidente Jejomar Binay sa Mindanao. Nabantang ni sa pagtidlom sa ratings ni Binay sa nahaunang surveys nga naglakip ni Duterte ug sa pagsulbong sa iyang ratings dihang wa apila si Duterte sa uwahing survey sa Pulse Asia sa niaging buwan.
Makabentaha ba si kanhi DILG Secretary Mar Roxas? Depende. Kon malansang ang iyang ratings ug padayong mosulbong ang kang Poe, mahimong makumbinser ang katawhan nga di na lang usikan ang ilang boto para niya.