Lingi sa karaang Sinulog

Sa among pag-cover sa Sinulog niadtong wa pay mobile phones, daghan na uyamot nga katuigan ang nilabay, wa pa maabot sa Sugbo ang kalibotanong hulga sa terorismo busa wa pa kakita ang mga tigpasiugda sa panginahanglan paghabol sa tibuok ruta og signal jammers.

Jammers sab hinuon ang seryusong hulga sa among live coverages niadto. Sila ang mga tag-iya ug VHF (very high frequency) radio sets nga magsige og kitkit sa ilang radyo, magsige og balhin-balhin og frequency pagpangita og maka-istorya, hangtod nga makatultol sa among frequency ug kay wa may makatultol hain sila magpatuyang sa pagsapaw og mga binuang ug binastos sa among field reports.

* * * Wa pa say cell sites niadto nga mahimong pawngon kon may seryuso nang mga hulga sa seguridad. Ang mga telepono niadtong higayona pulos landlines, nga mahulga lang maputol kon masaghiran og dagkong trak ang mga poste sa mga kable, o kon mataligam-an sa pagbayad dayon ang PLDT nga nag-monopoliya pa niadtong telepono.

Kining karaang mga paagi sa komunikasyon, nga hapit na mataboni sa kasayon ug kabarato sa unlimited nga text messaging ug voice calls sa mobile phones, maoy gidangpan sa mga institusyon nga direktang maigo sa pag-uyon sa higanteng mga kompaniya sa telepono pagpawong sa ilang cell sites nga nagserbisyo sa mga ruta sa prosesyon karong Sabado ug parada karong Dominggo.

* * * Di mahingpit ang paglingi sa karaang Sinulog kon di hisgutan si anhing Juan "Dodong" Aquino, kanhi executive director sa Sinulog Foundation. Usa sa iyang taras mao ang pagbaktas sa tibuok ruta. Nisugot siyang magkuyog mi. Maong akoy usa sa labing unang naka-report sa bisan unsang kakulian sa parada.

Naanad na si Aquino nga dut-an sa akong VHF pagtubag sa way kinutoban nakong mga pangutana. Sa mga higayong nipid-ok ang baterya sa VHF, nisugot ra sab siya nga manghunong mi kadiyot og tindahan aron makagamit ko og landline ug mapahibawo niya ang labing uwahing kalamboan sa Sinulog.

* * *