Paglingi sa Mamasapano
Kon kaablihan pagbalik ang imbestigasyon sa Mamasapano massacre duha ka tuig ang nilabay karong adlawa, masentro sa pakisusi ang hepe karon sa Police Regional Office sa Central Visayas nga si Chief Superintendent Noli Taliño kinsa maoy luyuluyong hepe sa Special Action Force a Philippine National Police.
Kay gustong magpakisayod si Presidente Rodrigo Duterte nganong wa matabangi sa kasundalohan ang naapiki nga SAF commandos bisan nilungtad og tibuok adlaw ang pinusilay. Si Taliño ang gitahasan sa pagpakitabang sa 1st Mechanized Brigade headquarters. Napakyas siya pagkumbinser sa militar paghatag og artillery support sa gimasaker nilang kaubanan.
Gawas ni Taliño, nakigkita sab sa pangu sa 1st Mechanized Brigade nga si Koronel Gener del Rosario sa buntag sa Enero 25 duha ka tuig ang nilabay ang SAF batallion commander nga si Senior Inspector Michael John Mangahis. Gipasanginlan silang del Rosario nga nagdumili paghatag og hingpit nga kasayuran sa nabulilyaso nga operasyon.
Labing nakapaduda ni del Rosario sa demanda nilang Taliño ug Mangahis sa artillery support mao ang ilang paggamit og zoomed in nga Google Maps. Igo lang nibanabana hain nahimutang ang naapiking una, ikaduha ug ikatulong grupo nga wa gani maghisgot og units.
*** Gipangutana ni del Rosario silang Taliño ug Mangahis sa sitwasyon. Nitubag sila nga nisibog nang nag-unang grupo paingon sa wala. Nangutana si del Rosario unsay plano aron matabangan sa reinforcement. Hilom silang Taliño ug Mangahis.
Nisugyot si del Rosario nga magpada og mga sundawo ug armored vehicle sa wala nga bahin nga maoy giikyasan sa SAF commandos. Apan niinsistir si Taliño sa paggamit og kanyon batok sa naglibot nga armadong mga grupo. Nibalibad si del Rosario kay wa sila mahibawo sa tukmang nahimutangan sa SAF. Wa motubag silang Taliño og Mangahis.
*** Gipasabot ni retired police director Getulio Napeñas, pangu sa SAF, nga di Google Maps ang ilang gigamit kon dili intelligence map nga may grid references, gipadako sa kinadul-ang usa ka metro, nga hinatag sa Estados Unidos duha ka semana sa wa pang operasyon.
Matod ni Napeñas, gitamdan sab nilang aerial photos sa Philippine Air Force sa Mamasapano. Apan si del Rosario niingon nga Google Maps ray gipakita nilang Taliño ug Mangahis.